Ram Navami 2025: अयोध्येत उत्सवाचं वातावरण, सुरक्षेच्या पार्शवभूमीवर रामलल्लाला सूर्य टिळक

उत्तर प्रदेश: अयोध्या नगरीत राम नवमीच्या पावन पर्वावर भक्तिमय वातावरणाची अनुभूती होत आहे. प्रभू श्रीरामांच्या जन्मोत्सवानिमित्त लाखो भाविक अयोध्येत दाखल झाले असून, मंदिर परिसर भक्तांच्या उत्साहाने गजबजला आहे. यंदाच्या राम नवमीच्या दिवशी रामलल्लाच्या मूर्तीवर सूर्य तिलक करण्याचा विशेष सोहळा आयोजित करण्यात आला आहे. या दिव्य क्षणात, सूर्यकिरण रामलल्लाच्या कपाळावर पडून तिलकाची प्रतिमा निर्माण करतात, ज्यामुळे भक्तांना अनोखा आध्यात्मिक अनुभव मिळतो.

भाविकांची वाढती संख्या लक्षात घेता, आजच्या दिवशी राम मंदिराच्या दर्शनासाठी व्हीआयपी पास रद्द करण्यात आले आहेत. सकाळी 9 वाजल्यापासून दुपारी 12 वाजेपर्यंत सर्वसामान्य भक्तांना प्राधान्य देण्यासाठी हा निर्णय घेण्यात आला आहे.

हेही वाचा: Ram Navami 2025: रामकथेतून काय शिकावं? जाणून घ्या श्रीरामाच्या जीवनातील अमूल्य धडे

सुरक्षेच्या दृष्टीने, अयोध्या शहरात कडक पोलीस बंदोबस्त ठेवण्यात आला आहे. अयोध्या परिसराला विविध झोन आणि सेक्टरमध्ये विभागून, पोलीस, पॅरामिलिटरी फोर्सेस, NDRF, SDRF, आणि जल पोलिसांची तैनाती करण्यात आली आहे. सरयू नदीच्या परिसरात विशेष लक्ष ठेवण्यात येत आहे.

राम नवमीच्या निमित्ताने अयोध्या नगरीत विविध धार्मिक कार्यक्रमांचे आयोजन करण्यात आले आहे. रामलल्लाच्या अभिषेक, श्रृंगार, आरती, आणि छप्पन भोग यांसारख्या विधींचे आयोजन करण्यात आले आहे.

भाविकांनी प्रशासनाच्या सूचनांचे पालन करून, या पवित्र सोहळ्याचा आनंद घ्यावा, असे आवाहन करण्यात आले आहे.