मुंबईत मलेरियाचे 633 नवीन रुग्ण; डेंग्यूच्या रुग्णातही वाढ

मुंबई: मुंबईत गेल्या काही दिवसांपासून मलेरिया आणि डेंग्यूच्या रुग्णांमध्ये मोठ्या प्रमाणावर वाढ झाली आहे. बीएमसीच्या सार्वजनिक आरोग्य विभागाच्या साथीच्या कक्षाच्या नवीन अहवालानुसार, गेल्या पंधरवड्यात शहरात मलेरियाच्या रुग्णांची संख्या 633 ने वाढली आहे. 1 जुलै रोजी विभागाने सांगितले होते की, जानेवारी ते जून दरम्यान शहरात मलेरियाचे 2857 रुग्ण आढळले होते, तर यावर्षी 14 जुलैपर्यंत हे रुग्ण 3490 पर्यंत पोहोचले आहेत. याशिवाय, याच कालावधीत शहरात डेंग्यूचे 282 रुग्णही वाढले आहेत. 

हेही वाचा - अहिल्यानगर महापालिकेतील रस्त्यांच्या कामात 350 ते 400 कोटींहून अधिक महाघोटाळा

मलेरिया, डेंग्यू आणि चिकनगुनियाच्या रुग्णांमध्ये वाढ - 

याशिवाय, गेल्या 15 दिवसांत लेप्टोस्पायरोसिस आणि गॅस्ट्रोएन्टेरिटिसच्या रुग्णांमध्येही वाढ झाली आहे. जानेवारी ते जून अखेरपर्यंत अनुक्रमे 136 आणि 4831 रुग्ण आढळले आहेत. अहवालात म्हटले आहे की, या वर्षी मे महिन्यात लवकर पाऊस पडल्याने कीटकजन्य आजारांसाठी अनुकूल वातावरण निर्माण झाले, ज्यामुळे मलेरिया, डेंग्यू आणि चिकनगुनियाच्या रुग्णांमध्ये वाढ झाली आहे.

हेही वाचा -  'नीट'च्या परीक्षेत अपयश मिळाल्याने विद्यार्थिनीने संपवलं जीवन

डासांची पैदास रोखण्यासाठी सूचना जारी - 

जुलैमध्ये दिल्लीतील राष्ट्रीय कीटकजन्य रोग नियंत्रण केंद्र (NCVBDC) चे संचालक, कार्यक्रम व्यवस्थापक आणि एक कीटकशास्त्रज्ञ यांनी शून्य डास प्रजनन मोहिमेसाठी मुंबईला भेट दिली होती. या मोहिमेअंतर्गत, महानगरपालिका संचालित रुग्णालये आणि इतर कार्यालयांच्या परिसरात डासांची पैदास रोखण्यासाठी आणि मच्छरदाण्यांचा वापर करण्यास प्रोत्साहन देण्यासाठी सूचना जारी करण्यात आल्या आहेत.