Manoj Jarange Patil Health Update : मनोज जरांगेंची प्रकृती खालावली, अनेक आंदोलकही आजारी, जाणून घ्या कशी आहे परिस्थिती

मराठा समाजाचे कार्यकर्ते मनोज जरांगे पाटील हे मराठ्यांना आरक्षण देण्याच्या मागणीवर ठाम आहेत. ते मुंबईतील आझाद मैदानावर उपोषणाला बसले आहेत. उपोषणामुळे मनोज जरांगे पाटील यांची प्रकृती खालावली आहे. त्यांची प्रकृती बिघडल्यानंतर डॉक्टरांना बोलावण्यात आले. मनोज जरांगे यांनी शुक्रवारी मुंबईतील आझाद मैदानावर मराठा समाजाला ओबीसी प्रवर्गाच्या आधारे आरक्षण मिळावे या मागणीसाठी उपोषण सुरू केले. यानंतर, रविवारी त्यांच्या  उपोषणाचा तिसरा दिवस आहे. गेल्या दोन दिवसांपासून पोटात अन्न किंवा पाणी न आल्यामुळे मनोज जरांगे पाटील यांची प्रकृती बिघडू लागली आहे.

मनोज जरांगे पाटील सध्या झोपले असले तरी शनिवारी मध्यरात्रीच्या सुमारास त्यांना अस्वस्थ वाटू लागले. त्यामुळे आझाद मैदानातील डॉक्टरांना तात्काळ बोलावण्यात आले. डॉक्टरांनी त्यांची तपासणी केली. मनोज जरांगे यांचे उपोषण आणखी काही काळ सुरू राहिले तर त्यांची प्रकृती झपाट्याने बिघडू शकते. त्यामुळे राज्य सरकार आणि मुख्यमंत्री देवेंद्र फडणवीस आज या प्रकरणी काही निर्णय घेणार का, याकडे सर्वांच्या नजरा लागल्या आहेत.

हेही वाचा - Maratha Protest: मराठा आंदोलनावेळी दुर्देवी घटना; एका मराठा आंदोलकाचा मृत्यू 

मराठा आरक्षणाच्या मागणीसाठी सुरू असलेल्या निदर्शनांमध्ये सामील होण्यासाठी आलेले अनेक निदर्शक गेल्या दोन दिवसांपासून जीटी हॉस्पिटल आणि सेंट जॉर्ज हॉस्पिटलमध्ये उपचारासाठी येत आहेत.

हेही वाचा - Manoj Jarange Patil: रविवारीही मनोज जरांगे उपोषण करणार, पोलिसांकडून एका दिवसाची परवानगी

या दोन्ही रुग्णालयांमध्ये गेल्या दोन दिवसांत सुमारे 100 आंदोलकांवर उपचार करण्यात आले आहेत. यामध्ये शरीरदुखी, डोकेदुखी, हातपाय दुखणे आणि सर्दी आणि खोकला यासारख्या सामान्य आजारांनी ग्रस्त रुग्णांचा समावेश आहे.