उन्हाच्या झळा वाढल्या; माठांची मागणी वाढली, बाजारपेठेत गरिबांचा फ्रीज दाखल

पारंपरिक माठांना पुनरुज्जीवन; बाजारात नवनवीन प्रकारांची भर छत्रपती संभाजीनगर | विजय चिडे प्रतिनिधी। यंदाच्या वर्षी उन्हाची तीव्रता प्रचंड वाढली असून, त्याचा प्रभाव जनजीवनावर मोठ्या प्रमाणात जाणवत आहे. वाढत्या तापमानामुळे गार पाण्याची मागणी वाढली आहे. त्यामुळे 'गरिबांचा फ्रीज' म्हणून ओळखल्या जाणाऱ्या मातीच्या माठांना बाजारात चांगली मागणी मिळत आहे. छत्रपती संभाजीनगर जिल्ह्यातील आठवडी बाजारात विविध प्रकारचे माठ मोठ्या प्रमाणात विक्रीस आले आहेत. परिणामी, माठ विक्रेत्यांना या वर्षी काहीसा दिलासा मिळण्याची चिन्हे आहेत.

माठ विक्रीत वाढ; बाजारपेठेत विविध पर्याय उपलब्ध शहर आणि ग्रामीण भागातील बाजारपेठांमध्ये सध्या रांजण, नळ असलेला माठ, रांजणी आणि साध्या माठांच्या विक्रीत वाढ झालेली दिसत आहे. माठांचे विविध प्रकार आणि त्यांचे आकर्षक डिझाइन्स ग्राहकांना भुरळ घालत आहेत. पारंपरिक काळ्या माठांसोबत राजस्थान आणि गुजरातमधून आणलेल्या लाल रंगाच्या नक्षीदार माठांनाही पसंती मिळत आहे.

काही वर्षांपूर्वी घरोघरी माठ आढळत असे. त्यातील थंडगार आणि चवदार पाणी लोकांना प्रचंड आवडायचे. मात्र, कालांतराने फ्रीज आणि मिनरल वॉटरने त्यांची जागा घेतली. तरीही, अनेकांना फ्रीजच्या पाण्याला पर्याय म्हणून माठातील पाणी अधिक प्रिय वाटत आहे. नैसर्गिकरित्या थंड राहणाऱ्या या पाण्याला बाजारात पुन्हा मागणी वाढत आहे.

उन्हाचा कडाका आणि माठांची किंमत वाढली सध्या उन्हाचा कडाका दिवसेंदिवस वाढत असून, त्याचा परिणाम माठांच्या किंमतीवरही झाला आहे. गेल्या वर्षीच्या तुलनेत माठांच्या किमतीत किंचित वाढ झाली आहे.

🔹 नळ असलेला माठ - २०० रुपये 🔹 रांजणी - ३०० ते ३५० रुपये 🔹 रांजण - ३०० ते ४०० रुपये

माठांची वाढती मागणी लक्षात घेता विक्रेत्यांनी विविध प्रकार उपलब्ध करून दिले आहेत. काही बाजारपेठांमध्ये ग्राहकांची गर्दी दिसत असून, लोक मोठ्या प्रमाणात माठ विकत घेत आहेत.

नैसर्गिक थंडावा आणि माठातील पाण्याचे आरोग्यदायी फायदे गावाकडील तसेच शहरातील अनेक लोक माठाच्या पाण्याला पसंती देत आहेत. वाढत्या तापमानात, माठातील पाणी शरीरासाठी फायदेशीर मानले जाते. फ्रीजच्या अतिथंड पाण्यामुळे घशाला त्रास होण्याची शक्यता असते, परंतु माठातील पाणी नैसर्गिकरित्या थंड आणि शरीराला अनुकूल असते.

माठ विक्रेत्या कुसुमबाई तोडेकर यांच्या मते, “तुम्ही कितीही फ्रीज किंवा जारचे पाणी प्याले तरी तहान भागत नाही. शेवटी माठातील गारगार पाणीच खरी तृप्ती देते.”

जारच्या पाण्यामुळे माठ विक्रेत्यांना अडचण? गेल्या काही वर्षांत बाजारात मोठ्या प्रमाणावर जारचे पाणी उपलब्ध होऊ लागल्याने काही ग्राहक त्याकडे वळले आहेत. वाडी-वस्त्यांवर सहजपणे जारच्या पाण्याची घरपोच सुविधा मिळू लागल्याने माठ विक्रेत्यांना याचा थोडाफार फटका बसला आहे.

माठ घडविणारे संतोष दळवी सांगतात, “उन्हाळ्यात लोक नैसर्गिकरित्या थंडगार पाणी पिण्याला पसंती देतात. मात्र, सध्या काही लोक जारच्या पाण्याकडे वळले आहेत. तरीही, माठाच्या पाण्याची चव आणि थंडावा वेगळाच असतो.”

पारंपरिक वारसा जपणारे माठ पुन्हा चर्चेत सध्या बाजारात माठांचा पारंपरिक वारसा टिकवून ठेवण्यासाठी प्रयत्न सुरू आहेत. माठाच्या नैसर्गिक थंडपणामुळे अनेक लोक पुन्हा त्याकडे वळत आहेत. शहर आणि ग्रामीण भागात विविध रंग, डिझाइन आणि आकारांमध्ये माठ उपलब्ध झाले आहेत, ज्यामुळे ग्राहकांना पर्याय वाढले आहेत.

यंदाच्या उन्हाळ्यात माठ विक्रीत वाढ होण्याची शक्यता असून, पारंपरिक माठांना नवसंजीवनी मिळत असल्याचे दिसत आहे.