Gold Price Today: स्वातंत्र्यदिनी ग्राहकांसाठी मोठी संधी, सोन्याच्या दरात घसरण; तुमच्या शहरातील दर जाणून घ्या

Gold Price Today: स्वातंत्र्य दिनाच्या निमित्ताने सोन्याच्या किमतीत घसरण झाल्याची चांगली बातमी ग्राहकांसाठी आली आहे. अनेक दिवसांपासून लाखाच्या आसपास ठाण मांडून बसलेले सोनं आज मात्र लाखाच्या आत आले आहे. यामुळे सणासुदीच्या खरेदीचा विचार करणाऱ्या ग्राहकांसाठी ही उत्तम संधी निर्माण झाली आहे.

आज सराफा बाजारात सोन्याच्या आणि चांदीच्या दरांमध्ये बदल दिसून आले. मल्टी कमोडिटी एक्सचेंज (MCX) वर सोन्याचा ऑक्टोबर वायदा आज सकाळी 99,850 रुपयांवर व्यवहार करत होता, जो कालच्या तुलनेत कमी आहे. बाजारात 10 ग्रॅम 22 कॅरेट सोन्याची किंमत 92,800 रुपये तर 24 कॅरेट सोन्याची किंमत 1,01,240 रुपये नोंदवली गेली. कालच्या तुलनेत सोनं 100 ते 300 रुपयांनी स्वस्त झालं आहे.

शहरनिहाय दर: मुंबई, पुणे, नागपूर, कोल्हापूर, जळगाव आणि ठाणे या सर्व ठिकाणी 22 कॅरेट सोन्याचा दर आज 92,800 रुपये प्रति 10 ग्रॅम आहे, तर काल हा दर 92,900 रुपये होता. 24 कॅरेटसाठी आजचा भाव 1,01,240 रुपये असून काल तो 1,01,350 रुपये होता.

चांदीचा दर: सोन्याच्या उलट चांदीत मात्र थोडी वाढ दिसली आहे. आज एक किलो चांदीचा दर 1,16,100 रुपये असून कालच्या तुलनेत 100 रुपयांनी वाढलेला आहे. चांदीच्या खरेदीदारांसाठी ही किंचित महागाई असली तरी सोनं स्वस्त झाल्यामुळे अनेक गुंतवणूकदार आणि ग्राहकांचे लक्ष सोन्याकडे वळण्याची शक्यता आहे.

किंमतीत घसरणीची कारणे: गेल्या काही दिवसांपासून आंतरराष्ट्रीय बाजारात सोन्याच्या दरात चढ-उतार दिसत आहेत. डॉलरच्या मजबुतीसोबतच जागतिक आर्थिक घडामोडींमुळे सोन्याचे दर कमी-जास्त होत आहेत. भारतात सणासुदीच्या काळात मागणी वाढण्याची शक्यता असली तरी सध्या झालेल्या घसरणीमुळे ग्राहकांना खरेदीसाठी आकर्षित करण्याचा प्रयत्न बाजार करत आहे. हेही वाचा: SIP Investment Tips: SIP करताय? 'या' 4 चुका तुमचा नफा खाऊन टाकतात; जाणून घ्या सणासुदीची संधी: ऑगस्ट महिन्यात रक्षाबंधन, श्रावणातील महत्त्वाचे सण आणि पुढे गणेशोत्सव असल्यामुळे सोन्याच्या खरेदीसाठी मोठी मागणी असते. याच पार्श्वभूमीवर स्वातंत्र्य दिनी झालेली किंमतीतली घसरण ग्राहकांसाठी सोन्याच्या खरेदीची सुवर्णसंधी ठरू शकते.

ग्राहकांचा कल: सराफा व्यापाऱ्यांच्या मते, लाखाचा टप्पा ओलांडलेल्या सोन्यामुळे अनेक ग्राहकांनी खरेदी पुढे ढकलली होती. मात्र, आज झालेल्या घसरणीमुळे पुन्हा बाजारात चैतन्य निर्माण होईल अशी अपेक्षा आहे. विशेषतः लग्न समारंभ, साखरपुडा किंवा गुंतवणूक या कारणांसाठी सोनं घेणारे ग्राहक या दरात खरेदीस प्राधान्य देऊ शकतात.

सोन्याच्या किमतीत घसरण झाल्याने आजचा दिवस ग्राहकांसाठी खास ठरू शकतो. स्वातंत्र्य दिनाच्या उत्साहात आणि सणासुदीच्या वातावरणात सोन्याच्या खरेदीची लाट पुन्हा उसळण्याची शक्यता आहे. चांदी थोडी महाग झालेली असली तरी सोन्यातील घसरणीने बाजारात सकारात्मक हवा निर्माण केली आहे. त्यामुळे आजचा दिवस खरेदीसाठी ‘गोल्डन डे’ म्हणावा लागेल.