महानगरपालिका निवडणुकीसाठी आदित्य ठाकरे सज्ज

मुंबई : मुंबई महानगरपालिकेची निवडणूक जवळ येत असताना, उद्धव ठाकरे यांच्या नेतृत्वाखाली गटाने ही निवडणूक जिंकण्यासाठी जोरदार तयारीला सुरुवात केली आहे. विधानसभेतील अपयशानंतर आता मुंबईचा “शेवटचा बालेकिल्ला” राखणे ठाकरे गटासाठी अत्यंत महत्त्वाचे झाले आहे. याच कारणास्तव, युवा नेते आदित्य ठाकरे यांनी ग्राऊंड लेव्हलवर पक्षाला बळकट करण्यासाठी नेतृत्वाची धुरा सांभाळली आहे.

गेल्या अनेक वर्षांपासून मुंबई महानगरपालिकेवर शिवसेनेचा भगवा फडकत आहे. मात्र, शिवसेनेतील फूट आणि विधानसभा निवडणुकीत सपाटून झालेला पराभव यामुळे शिवसेनेच्या परंपरागत मतदारांमध्ये संभ्रमाचे वातावरण निर्माण झाले आहे. जर महानगरपालिकेची सत्ता गमवावी लागली, तर उद्धव ठाकरे यांच्यासमोर राजकीय अस्तित्व टिकवणे अधिक आव्हानात्मक होईल, अशी चर्चा राजकीय वर्तुळात सुरू आहे.

आदित्य ठाकरे यांची रणनीती

या पार्श्वभूमीवर आदित्य ठाकरे यांनी आता थेट मैदानात उतरण्याचा निर्णय घेतला आहे. त्यांनी प्रभाग पातळीवरील नेते आणि कार्यकर्त्यांसोबत बैठका घेतल्या असून, संघटन मजबूत करण्यावर भर दिला आहे. यासाठी त्यांनी जुन्या जाणत्या कार्यकर्त्यांना पुन्हा सक्रिय करण्याचे धोरण स्वीकारले आहे. हे नेते आणि कार्यकर्ते शिवसेनेच्या सुवर्णकाळातील साक्षीदार असून, त्यांचा अनुभव आणि निष्ठा पक्षाच्या कामी येईल, असा विश्वास आदित्य ठाकरे व्यक्त करत आहेत. पक्षाच्या या नव्या रणनीतीमुळे कार्यकर्त्यांमध्ये नवचैतन्य निर्माण झाले आहे. अनेक कार्यकर्त्यांनी पक्षासाठी जुना जोश दाखवण्यास सुरुवात केली आहे. याशिवाय, ठाकरे गटाने सोशल मीडिया, जनसंपर्क मोहिमा, आणि प्रभागातील मतदारांशी थेट संवाद साधण्यावर भर दिला आहे. मुंबईतील स्थानिक प्रश्नांवर फोकस करून मतदारांशी जवळीक साधण्याचा त्यांचा प्रयत्न आहे.

मुंबई महानगरपालिका निवडणूक ही फक्त स्थानिक निवडणूक नसून, ती ठाकरे गटासाठी प्रतिष्ठेचा प्रश्न बनली आहे. दुसरीकडे, विरोधी गटही या निवडणुकीत आपले वर्चस्व सिद्ध करण्यासाठी कंबर कसत आहे. त्यामुळे आगामी निवडणूक हा शिवसेनेच्या राजकीय वाटचालीसाठी निर्णायक टप्पा ठरू शकतो.मुंबई महानगरपालिका निवडणुकीसाठी आदित्य ठाकरे यांची रणनीती आणि ठाकरे गटाच्या हालचालींवर संपूर्ण राज्याचे लक्ष लागले आहे. त्यांच्या प्रयत्नांना यश मिळते की नाही, हे आगामी निवडणुकीत स्पष्ट होईल. पण सध्या तरी, ठाकरे गट या निवडणुकीसाठी सर्वतोपरी प्रयत्न करत आहे.