World Para Athletics Championships : जागतिक पॅरा अ‍ॅथलेटिक्स चॅम्पियनशिपमध्ये 35 भारतीय खेळाडूंचे पदार्पण
World Para Athletics Championships 2025: 27 सप्टेंबर ते 5 ऑक्टोबर दरम्यान नवी दिल्लीतील जवाहरलाल नेहरू स्टेडियमवर होणाऱ्या जागतिक पॅरा अ‍ॅथलेटिक्स चॅम्पियनशिप 2025 मध्ये भारताचा आतापर्यंतचा सर्वात मोठा संघ सहभागी होणार आहे. या स्पर्धेत एकूण 35 भारतीय खेळाडू प्रथमच जागतिक मंचावर पदार्पण करतील. भारतीय पॅरा क्रीडा इतिहासातील हा एक नवीन अध्याय मानला जातो.
महेंद्र गुर्जरचे विक्रमी पदार्पण
भालाफेकपटू महेंद्र गुर्जर हे या नवोदित खेळाडूंमधील सर्वात मोठे नाव आहे. गुर्जरने यावर्षी स्वित्झर्लंडमधील नॉटविल ग्रांप्रीमध्ये पुरुषांच्या F42 प्रकारात 61.17 मीटर भालाफेक करून नवा विश्वविक्रम प्रस्थापित केला. सध्या पटियाला येथे प्रशिक्षण घेत असलेला गुर्जर त्याच्या पहिल्या जागतिक अजिंक्यपद स्पर्धेत पदक जिंकून भारताला अभिमानास्पद कामगिरी करण्यास सज्ज आहे.
गुर्जर यांनी म्हटले की, 'ही स्पर्धा केवळ पदकांसाठी नाही, तर भारतीय पॅरा खेळाडूंच्या क्षमतेची जागतिक पातळीवर जाणीव करून देण्याबाबत आहे. आमची कामगिरी अधिक तरुणांना, विशेषतः मुलींना त्यांच्या क्रीडा स्वप्नांचा पाठलाग करण्यास प्रोत्साहित करेल.'
हेही वाचा - Asia Cup 2025: आशिया कपचे वेळापत्रक जाहीर; टीम इंडियाचे सामने कधी आणि कुठे खेळले जाणार? जाणून घ्या
नवोदित खेळाडूंचा रोख
पहिल्यांदाच सहभागी होणाऱ्या खेळाडूंमध्ये अतुल कौशिक (डिस्कस थ्रो F57), प्रवीण (डिस्कस थ्रो F46), हनी (डिस्कस थ्रो F37), मित पटेल (लांब उडी T44), मनजीत (भालाफेक F13), विशु (लांब उडी T12), पुष्पेंद्र सिंग (भालाफेक F44), अजय सिंग (लांब उडी T47), शुभम जुयाल (शॉट पुट F57), वीरभद्र सिंग (डिस्कस थ्रो F57), दयावंती (महिला 400 मीटर T20), अमिषा रावत (महिला शॉट पुट F46), आनंदी कुलंथायसम (क्लब थ्रो F32) आणि सुचित्रा परिदा (महिला भालाफेक F56) यांचा समावेश आहे.
हेही वाचा - Gold Medal: भारताचा ऐतिहासिक विजय! प्रथमेश फुगेच्या तुफान कामगिरीतून जागतिक तिरंदाजीत सुवर्ण पदक
भारतात होणार ऐतिहासिक स्पर्धा -
ही स्पर्धा भारतातील आतापर्यंतची सर्वात मोठी पॅरा स्पर्धा मानली जाते. 100 हून अधिक देशांतील 2200 हून अधिक खेळाडू आणि अधिकारी यात सहभागी होतील. एकूण 186 पदक स्पर्धा आयोजित केल्या जातील आणि भारतीय खेळाडूंकडून दमदार कामगिरीची अपेक्षा आहे.