Pakistan Flood : पाकिस्तानात हाहाकार! पुरामुळे 21 लाख लोक बेघर; आतापर्यंत 900 मृत्यू, हवामान आणीबाणी लागू

Pakistan Flood : पाकिस्तानच्या पंजाब आणि सिंधमध्ये पुरामुळे लाखो लोक प्रभावित झाले आहेत. 21.5 लाखांहून अधिक लोकांना वाचवण्यात आले आहे. जूनपासून पाऊस आणि पूर संबंधित घटनांमध्ये 900 हून अधिक लोकांचा मृत्यू झाला आहे. संयुक्त राष्ट्रांनी पाकिस्तानला 41.5 कोटी रुपयांची मदत दिली आहे. पाकिस्तान सरकारने हवामान आणीबाणी जाहीर केली आहे आणि पुढील 300 दिवसांसासाठी बचावकार्य आणि लोकांच्या मदतीसाठी योजना आखण्याचे आदेश दिले आहेत.

पाकिस्तानमध्ये पूर हाहाकार माजवत आहे. एकट्या पंजाब प्रांतातून 20 लाखांहून अधिक लोकांना वाचवण्यात आले आहे आणि सुरक्षित ठिकाणी नेण्यात आले आहे. तर, सिंध प्रांतातून 1.5 लाख लोकांना स्थलांतरित करण्यात आले आहे. येत्या काही दिवसांत ही संख्या आणखी वाढू शकते. जूनच्या अखेरीपासून देशभरात पाऊस आणि संबंधित घटनांमध्ये 900 हून अधिक लोकांचा मृत्यू झाला आहे.

हेही वाचा - Gen-Z On Army Headquarters : '...तर लष्कराचे मुख्यालय जाळून टाकू', नेपाळमध्ये Gen-Z चा पुन्हा एकदा अल्टीमेटम

पाकिस्तानमध्ये मुसळधार पावसामुळे सतलज, चिनाब आणि रावी नद्यांना पूर आला आहे. याशिवाय, सिंधू नदी आणि तिच्या उपनद्यांमधील पाण्याची पातळीही वाढली आहे. पाकिस्तानमधील सुमारे 40 टक्के लोक दारिद्र्यरेषेखाली राहतात आणि पुरामुळे त्यांची शेती आणि घरे उद्ध्वस्त झाली आहेत. पुराचा धोका असूनही, अनेक कुटुंबे त्यांच्या मालमत्तेचे रक्षण करण्यासाठी आणि जीव धोक्यात घालून घरीच राहत आहेत.

बचावादरम्यान अपघातात 9 जणांचा मृत्यू बचाव कर्मचारी बोटींद्वारे लोक आणि प्राण्यांना वाचवत आहेत. परंतु, या काळात पाण्याच्या जोरदार प्रवाहामुळे लहान बोटी उलटण्याचा धोका देखील आहे. मंगळवारी, सिंधू नदीत पूरग्रस्तांना घेऊन जाणारी एक बचाव बोट उलटल्याने 9 जणांचा मृत्यू झाला. काही दिवसांपूर्वी, जलालपूर पिरवाला शहरातील एका भागातही अशीच घटना घडली होती. यामध्ये 5 जणांचा मृत्यू झाला होता. पाकिस्तानच्या राष्ट्रीय आपत्ती व्यवस्थापन प्राधिकरणाने म्हटले आहे की, त्यांनी पंजाबच्या पूरग्रस्त भागात ब्लँकेट, तंबू आणि वॉटर फिल्टरसह अनेक टन मदत साहित्य पोहोचवले आहे.

संयुक्त राष्ट्रांनी 41.5 कोटी रुपयांची मदत दिली या आठवड्यात, संयुक्त राष्ट्रांनी पाकिस्तानच्या पूरग्रस्तांच्या मदतीसाठी 5 दशलक्ष डॉलर्स म्हणजेच 41.5 कोटी रुपयांचा निधी उपलब्ध करून दिला आहे. भौगोलिक स्थानामुळे पाकिस्तान पुराच्या बाबतीत अत्यंत असुरक्षित आहे. वितळणाऱ्या हिमनद्यांमुळे नवीन तलावही तयार झाले आहेत, जे फुटण्याचा धोका आहे. 2022 मध्ये, पाकिस्तानमध्ये आलेल्या पुरामुळे 1,700 हून अधिक लोकांचा मृत्यू झाला आणि 3 कोटींहून अधिक लोक प्रभावित झाले.

पाकिस्तानमध्ये हवामान आणीबाणी जाहीर गंभीर पूरस्थिती पाहता, पाकिस्तानने या आठवड्यात हवामान आणीबाणी जाहीर केली आहे. पंतप्रधान शाहबाज शरीफ यांनी अधिकाऱ्यांना हवामान बदलामुळे निर्माण होणाऱ्या आव्हानांना तोंड देण्यासाठी 300 दिवसांचा आराखडा तयार करण्याचे आदेश दिले आहेत. बुधवारी झालेल्या मंत्रीमंडळ बैठकीत शरीफ म्हणाले की, हवामान बदलामुळे होणारे नुकसान रोखण्यासाठी ते लवकरच देशातील सर्व 4 प्रांतांच्या मुख्यमंत्र्यांसह आणि प्रमुख अधिकाऱ्यांसोबत बैठक बोलावणार आहेत.

हेही वाचा - Emmanuel Macron Crushed Rebellion : फ्रान्सच्या अध्यक्षांनी आंदोलन दडपलं; अन्यथा झाली असती नेपाळसारखी स्थिती