Umer Shah Shocking Death : 'पीछे तो देखो' मीममुळे लोकप्रिय झालेल्या अहमद शाहच्या लहान भावाचा आकस्मिक मृत्यू

इस्लामाबाद : पाकिस्तानच्या मनोरंजन विश्वात सध्या शोककळा पसरली आहे. सोशल मीडियावर 'पीछे देखो पीछे' या मीममुळे लोकप्रिय झालेल्या बालकलाकार अहमद शाहचा धाकटा भाऊ उमर शाह याचे वयाच्या अवघ्या 15 व्या वर्षी हृदयविकाराच्या झटक्याने (Cardiac Arrest) निधन झाले. डेरा इस्माईल खान या त्यांच्या मूळगावी सोमवारी सकाळी ही दुर्दैवी घटना घडली.

अचानक झालेल्या या निधनाने सर्वांनाच मोठा धक्का बसला आहे. एका इंग्रजी वृत्तपत्रानुसार, उमरला उलट्यांचा त्रास झाला, ज्यामुळे द्रव पदार्थ त्याच्या फुफ्फुसांमध्ये गेला आणि त्याला हृदयविकाराचा झटका आला. याआधी त्यांच्या घराच्या परिसरात एक विषारी साप आला होता, अशी माहितीही समोर आली होती. मात्र, याचा उमर शाह याच्या मृत्यूशी काही संबंध आहे का, ही बाब स्पष्ट नाही. अहमद शाहने आपल्या इंस्टाग्राम अकाउंटवर ही दु:खद बातमी शेअर करत चाहत्यांना उमरसाठी प्रार्थना करण्याचे आवाहन केले आहे. या कुटुंबावर दुःखाचा डोंगर दुसऱ्यांदा कोसळला आहे. याआधी, नोव्हेंबर 2023 मध्ये त्यांची सर्वात लहान बहीण आयेशा हिचा मृत्यू झाला होते.

मात्र, या घटनेमुळे लहान मुले, किशोरवयीन आणि तरुणांमध्ये हृदयविकाराचे प्रमाण वाढत आहे. तज्ज्ञांकडून याची कारणे काय सांगितली जातात, जाणून घेऊ..

कार्डिॲक अरेस्ट म्हणजे काय? हृदयविकाराचा झटका (Heart Attack) आणि कार्डिॲक अरेस्ट (Cardiac Arrest) या दोन वेगवेगळ्या गोष्टी आहेत. अनेकदा लोक यात गोंधळतात. हृदयविकाराचा झटका (Heart Attack): जेव्हा हृदयाच्या रक्तवाहिन्यांमध्ये अडथळा येतो आणि रक्तपुरवठा थांबतो किंवा खूप मंदावतो तेव्हा हृदयविकाराचा झटका येतो. कार्डिॲक अरेस्ट (Cardiac Arrest): यामध्ये हृदयाचे ठोके अचानक बंद पडतात. रक्तप्रवाह थांबतो आणि व्यक्ती तत्काळ बेशुद्ध पडते. अशा वेळी, त्वरित वैद्यकीय मदत न मिळाल्यास काही मिनिटांतच मृत्यू होऊ शकतो.

हेही वाचा - Health Tips: दीर्घ उपवासानंतर कोणत्या गोष्टी टाळाव्यात?, अन्यथा पचनक्रिया बिघडेल

लहान वयात हृदयविकाराची वाढती समस्या आजकाल हृदयविकाराची समस्या फक्त वृद्धांपर्यंत मर्यादित राहिलेली नाही, तर तरुण आणि लहान मुलांनाही याचा सामना करावा लागत आहे. यामागे अनेक कारणे आहेत: अयोग्य आहार: जंक फूड, प्रक्रिया केलेले अन्न आणि जास्त साखर यामुळे शरीरात कोलेस्ट्रॉल वाढते, ज्यामुळे हृदयाच्या रक्तवाहिन्यांमध्ये अडथळे निर्माण होतात. तणाव: सध्याच्या धकाधकीच्या जीवनात ताणतणाव ही सामान्य गोष्ट बनली आहे. सततच्या तणावामुळे शरीरात कॉर्टिसोलसारखे संप्रेरक वाढतात, जे हृदयासाठी हानिकारक असतात. व्यायामाचा अभाव: तासनतास कॉम्प्युटर आणि मोबाईलवर बसून राहिल्याने शारीरिक हालचाल कमी झाली आहे. यामुळे लठ्ठपणा वाढतो आणि हृदयावर ताण येतो. झोपेचा अभाव: पुरेशी झोप न घेतल्याने रक्तदाब वाढू शकतो आणि हृदयाचे ठोके अनियमित होऊ शकतात. व्यसने: धूम्रपान आणि मद्यपानामुळे रक्ताभिसरण संस्थेवर वाईट परिणाम होतो आणि हृदयविकाराचा धोका वाढतो. अनुवांशिक कारणे: कुटुंबात हृदयरोगाचा इतिहास असेल, तर हृदयविकाराचा धोका वाढतो.

हृदय निरोगी कसे ठेवाल? आपल्या हृदयाची काळजी घेण्यासाठी या सोप्या गोष्टींचा अवलंब करू शकता: पौष्टिक आहार: आहारात फळे, भाज्या आणि संपूर्ण धान्यांचा समावेश करा. जंक फूड आणि गोड पदार्थ खाणे टाळा. नियमित व्यायाम: दररोज किमान 30 मिनिटे चालणे, सायकल चालवणे किंवा इतर कोणताही व्यायाम करा. पुरेशी झोप: ताणतणाव कमी करण्यासाठी ध्यानसाधना आणि योगासने करा आणि दररोज 7-8 तास झोप घ्या. नियमित तपासणी: कुटुंबात हृदयरोगाचा इतिहास असल्यास नियमितपणे डॉक्टरांकडून आरोग्य तपासणी करून घ्या. उमर शाहच्या अकाली निधनाने ही समस्या किती गंभीर आहे, हे पुन्हा एकदा समोर आले आहे

हेही वाचा - Sugar Side Effects: साखर खाल्ल्याने चेहऱ्यावर वृद्धत्वाची चिन्हं?, जाणून घ्या धक्कादायक परिणाम

अशी लक्षणे दिसली तर सावधान! त्वरित वैद्यकीय मदत घ्या आपण किंवा आपल्या सभोवतालच्या कोणत्याही व्यक्तीला ही लक्षणे वाटत असल्यास, त्वरित डॉक्टरांशी संपर्क साधा:

छातीत दुखणे किंवा अस्वस्थता: छातीच्या मध्यभागी किंवा डाव्या बाजूला जडपणा, दबाव किंवा वेदना जाणवतात. श्वास घेण्यात अडचण: सहजपणे श्वास घेता येत नसेल, श्वास घेण्यात अडथळा येत असल्यासारखे वाटत असेल किंवा श्वास घेण्यासाठी खूप कष्ट पडत असतील तर डॉक्टरांशी संपर्क साधा. शरीरात वरच्या भागात वेदना: मान, जबडा, मागे किंवा डाव्या हातात वेदना जाणवणे. घाम येणे, चक्कर येणे किंवा मळमळ : अचानक खूप घाम येणे किंवा अशक्तपणा जाणवणे.