उबदार की थंड हात ;आरोग्याच्या दृष्टिकोनातून कोणते चांगले? जाणून घ्या हातांच्या तापमानामागचे आरोग्याचे संकेत

Hands Tell Your Health Story: आपल्या शरीरातील लहानसहान बदलही आरोग्याचे मोठे संकेत देत असतात. त्यातीलच एक महत्त्वाचा पण दुर्लक्षित घटक म्हणजे – आपल्या हातांचे तापमान. तुम्हाला माहिती आहे का, की तुमचे हात उबदार आहेत की थंड, यावरून तुमच्या आतड्यांच्या आरोग्यासह संपूर्ण शरीराच्या कार्यक्षमतेचा अंदाज घेता येतो?

अनेक वेळा आपण थंड किंवा उबदार हात असण्याकडे दुर्लक्ष करतो. पण, आरोग्यतज्ज्ञांच्या मते, हे तापमान केवळ बाह्य हवामानामुळे नसून शरीरातील अंतर्गत क्रियांचीही माहिती देते. विशेषतः रक्ताभिसरण, स्वायत्त मज्जासंस्था आणि पचनक्रिया यावर त्याचा प्रभाव असतो.

उबदार हात म्हणजे चांगले आरोग्य?

सतत उबदार राहणारे हात हे सामान्यतः चांगल्या आरोग्याचे लक्षण मानले जाते. रक्ताभिसरण व्यवस्थित असणे आणि मज्जासंस्थेचे संतुलन या गोष्टी उबदार हातांद्वारे व्यक्त होतात. निरोगी आतड्यांमुळे शरीरातील उर्जा आणि उष्णता समान प्रमाणात वितरित होते, यामुळे हात-पाय उबदार राहतात. शिवाय, उबदार हात मोकळेपणा, सकारात्मकता आणि मानसिक संतुलनाचेही प्रतीक मानले जातात.

थंड हात म्हणजे काहीतरी बिघाड?

सतत थंड राहणारे हात हे शरीरात काहीतरी बिघडत असल्याचे संकेत असू शकतात. यामागे खराब रक्ताभिसरण, वाढलेला मानसिक ताण, थायरॉईड विकार किंवा चयापचयाच्या समस्या असू शकतात. अशा स्थितीत आतड्यांचे कार्यही असंतुलित होण्याची शक्यता वाढते. थंड हात हे मज्जासंस्थेच्या अति प्रतिक्रियेमुळे भावनिक आकुंचन किंवा अस्थिरता दर्शवतात.

हातांशी संबंधित इतर लक्षणं काय सांगतात?

1. घाम येणारे हात हायपरहायड्रोसिस या स्थितीमुळे होतात, जिथे घामाच्या ग्रंथी अतिसक्रिय असतात. मधुमेह, थायरॉईड विकार किंवा काही औषधांच्या साइड इफेक्ट्समुळेही हे घडू शकते.

2. तळहातांना कोरडेपणा व खाज  ही पचनाशी संबंधित समस्या असू शकते. बद्धकोष्ठता, पोटफुगी किंवा यकृत विकार, त्वचाविकार, अॅलर्जी यांमुळेही हे लक्षण दिसून येते.

3. लालसर व गरम हात  हे देखील पचनाच्या समस्यांशी संबंधित असू शकते. उच्च रक्तदाब, व्यायाम, उबदार हवामान यामुळेही असे बदल दिसतात.

हातांचे तापमान हे केवळ बाह्य स्थिती नव्हे तर आतड्यांतील आरोग्य, मज्जासंस्थेचे कार्य आणि संपूर्ण चयापचय प्रक्रियेचे आरसे आहे. थंड किंवा गरम हात याकडे गांभीर्याने पाहणे गरजेचे आहे. सतत लक्षणे जाणवत असतील, तर डॉक्टरांचा सल्ला घेणे अत्यावश्यक आहे. कारण शरीर आपल्याला अनेक प्रकारे इशारे देत असते, आणि त्यात हातांचे तापमानही एक महत्त्वाचा इशारा असतो.