स्वयंपाकघर हे प्रत्येक घराचा एक अविभाज्य भाग आहे आणि त्याला घराचे हृदय देखील म्हणतात. याच ठिकाणी अन्न तयार केले जाते जे केवळ आपल्या चविष्ट चवींसाठीच नव्हे तर आरोग्यदायी आणि पोषक आहारासाठी महत्त्वाचे असते. स्वयंपाकघराच्या बांधणीसाठी काही नियम पाळणे अत्यंत आवश्यक आहे.
स्वयंपाकघरासाठी सर्वात योग्य दिशा म्हणजे दक्षिण-पूर्व (आग्नेय) दिशा, कारण या दिशेचा स्वामी अग्निदेव आहे. या दिशेला स्वयंपाकघर असल्यास कुटुंबाच्या आरोग्यास फायदेशीर ठरते आणि घरात समृद्धी येते.
गॅस शेगडी किंवा स्टोव्ह स्वयंपाकघराच्या आग्नेय दिशेत ठेवावा. तसेच, स्वयंपाक करताना पूर्व दिशेकडे तोंड करून अन्न शिजवावे. असे केल्याने घरात सौख्य आणि समृद्धी येते.
- इलेक्ट्रॉनिक उपकरणांचे स्थान
हीटर, टोस्टर, ओव्हन यांसारखी अग्नी तत्वाशी संबंधित उपकरणे आग्नेय दिशेत ठेवावीत.
फ्रिज पश्चिम दिशेला ठेवावा. असे केल्याने त्याचा योग्य वापर होतो आणि अन्न पदार्थ टिकून राहतात.
डाळी, मसाले आणि इतर खाद्यपदार्थ ठेवण्यासाठी दक्षिण आणि पश्चिम दिशेला स्टोरेज तयार करावे. असे केल्याने पदार्थांचा उत्तम प्रकारे उपयोग होतो.
- सिंक आणि गॅस शेगडी एकत्र ठेवू नका
गॅस शेगडी आणि स्वयंपाकघरातील सिंक हे अगदी जवळ ठेवू नये, कारण अग्नी आणि पाणी हे विरुद्ध तत्वे आहेत. असे केल्याने घरातील उर्जेचा समतोल बिघडतो आणि तणाव निर्माण होतो. जर आधीपासूनच असे असेल, तर त्यांच्या मध्ये संगमरवरी किंवा ग्रॅनाइटची भिंत तयार करावी.
- पाण्याचा स्रोत आणि सिंक कुठे असावा ?
पाणीपुरवठा, वॉशबेसिन किंवा सिंक यांसाठी ईशान्य दिशा उत्तम मानली जाते. तसेच, हे उत्तर किंवा पश्चिम दिशेच्या दिशेने असणे योग्य ठरते.
(सूचना : येथे दिलेली माहिती धार्मिक श्रद्धेवर आधारित आहे. याला कोणताही शास्त्रीय पुरावा नाही. जय महाराष्ट्र त्याची हमी देत नाही.)