नवी दिल्ली: अहमदाबाद अपघातानंतर एअर इंडियाच्या सर्व विमानाची अतिरिक्त तपासणी आणि इतर विविध कारणांमुळे अनेक आंतरराष्ट्रीय उड्डाणे रद्द करण्यात आली आहेत. वृत्तानुसार, एअर इंडियाने त्यांच्या आंतरराष्ट्रीय उड्डाणांमध्ये 15 टक्के कपात करण्याचा निर्णय घेतला आहे, जो जुलैच्या मध्यापर्यंत लागू राहील. 12 जून 2025 रोजी अहमदाबादहून उड्डाण केल्यानंतर लगेचच लंडनला जाणाऱ्या विमानाच्या भीषण अपघातानंतर हे पाऊल उचलण्यात आले आहे.
गेल्या सहा दिवसांत, एअरलाइनचे अनेक आंतरराष्ट्रीय उड्डाणे रद्द करण्यात आले आहेत, ज्यामुळे लोकांना अडचणी येत आहेत. तथापी, आता एअर इंडियाने प्रवाशांच्या सोयीसाठी परतफेड प्रक्रिया सोपी केली आहे. आता प्रवासी त्यांच्या बुकिंगच्या परतफेडीसाठी ऑनलाइन अर्ज करू शकतात आणि वेबसाइट किंवा मोबाइल अॅपद्वारे त्याची स्थिती देखील ट्रॅक करू शकतात.
हेही वाचा - एअर इंडियाच्या विमानाला बॉम्बची धमकी; रियाधमध्ये करण्यात आले आपत्कालीन लँडिंग
एअर इंडियाचे उड्डाण रद्द झाल्यानंतर तिकीटाचे पैसे परत कसे मिळवायचे?
अधिकृत वेबसाइट किंवा अॅपवरून 'बुकिंग व्यवस्थापित करा' विभागात जा आणि परतफेड पर्याय निवडा.
जर तुमचे तिकीट एअर इंडियाच्या शहर बुकिंग किंवा विमानतळ कार्यालयातून जारी केले गेले असेल, तर परतफेडीसाठी संबंधित कार्यालयाशी संपर्क साधा.
जर तिकीट ट्रॅव्हल एजंट किंवा इतर ऑनलाइन पोर्टलवरून खरेदी केले असेल, तर परतफेडीसाठी त्यांच्याशी संपर्क साधा.
रद्द झालेल्या फ्लाइटची परतफेड स्टेटस कसे तपासावे?
सर्वप्रथम एअरलाइनच्या वेबसाइट https://www.airindia.com/in/en/contact-us/customer-support-portal/refund… वर जा
येथे 'स्टेटस चेक ऑन पेंडिंग रिफंड' वर क्लिक करा.
आता आवश्यक माहिती भरा आणि सबमिट करा.
हेही वाचा - अहमदाबाद विमान अपघातानंतर DGCA ची मोठी कारवाई! एअर इंडियामधील 3 अधिकाऱ्यांना दाखवला बाहेरचा रस्ता
तथापी, जर तुमची फ्लाइट एअर इंडियाने रद्द केली असेल आणि तुम्ही रीशेड्युलिंगसाठी एअरलाइनचा सेल्फ-सर्व्हिस पर्याय निवडला असेल, तर यासाठी कोणतेही अतिरिक्त शुल्क आकारले जाणार नाही. सहसा परतफेड प्रक्रिया 7 ते 10 कामकाजाच्या दिवसांत पूर्ण होते. परतफेड करण्यास उशीर झाल्यास, ग्राहक केस आयडीसह एअर इंडियाच्या मदत पोर्टलवर तक्रार दाखल करू शकतात. परतफेड त्याच बँक खात्यात हस्तांतरित केली जाईल ज्यातून तुम्ही तिकीट बुक केले होते.