Weather Alert: यावर्षी सप्टेंबर महिन्यात भारतात सामान्यपेक्षा जास्त पाऊस पडणार असल्याचा इशारा भारतीय हवामान खात्याने (IMD) दिला आहे. देशाच्या अनेक भागांमध्ये आधीच मुसळधार पावसामुळे पूर आणि भूस्खलनाच्या घटना घडल्या आहेत. आता हवामान खात्याच्या ताज्या अंदाजानंतर नागरिकांनी अधिक सतर्क राहण्याची गरज निर्माण झाली आहे.
हवामान खात्याच्या मते, सप्टेंबर 2025 मध्ये मासिक सरासरी पाऊस 167.9 मिमी पेक्षा जास्त असण्याची शक्यता आहे, जो दीर्घकालीन सरासरीच्या 109 टक्के इतका आहे. यावेळी देशातील बहुतेक भागात सरासरीपेक्षा अधिक पाऊस पडण्याची अपेक्षा व्यक्त केली आहे. तथापि, ईशान्य भारत, पूर्व भारतातील काही भाग, सुदूर दक्षिण भारत आणि वायव्य भारतातील काही भागांमध्ये अपेक्षेपेक्षा कमी पाऊस होऊ शकतो.
हेही वाचा - Bihar Election 2025: मायावतींची मोठी घोषणा; बिहारमध्ये बसपा स्वबळावर निवडणूक लढणार
भूस्खलन आणि पुराचा धोका
ऑनलाइन पत्रकार परिषदेत आयएमडीचे महासंचालक मृत्युंजय महापात्रा यांनी सांगितले की, मुसळधार पावसामुळे उत्तराखंडमध्ये भूस्खलन आणि अचानक पूर येऊ शकतो. उत्तराखंडच्या नद्यांना पूर येण्याचा धोका असून सखल भागातील शहरे व गावांवर त्याचा परिणाम होऊ शकतो. याशिवाय, दक्षिण हरियाणा, दिल्ली, उत्तर राजस्थान आणि छत्तीसगडमधील महानदीच्या वरच्या पाणलोट क्षेत्रातही अतिवृष्टीचा परिणाम दिसून येईल.
हेही वाचा - Ethanol Fuel: सर्व वाहनांसाठी E20 पेट्रोल अनिवार्य होणार का? सर्वोच्च न्यायालयात उद्या महत्त्वाची सुनावणी
नागरिकांना सतर्कतेचे आवाहन
सप्टेंबरमध्ये मान्सून पूर्ण जोमात राहणार असल्याचे आयएमडीने स्पष्ट केले आहे. त्यामुळे नागरिकांनी हवामान विभागाच्या इशाऱ्यांकडे लक्ष द्यावे, पूर व भूस्खलनाच्या धोक्याच्या पार्श्वभूमीवर सावधगिरी बाळगावी आणि सुरक्षिततेसाठी आवश्यक ती पावले उचलावीत, असे आवाहन करण्यात आले आहे.