नवी दिल्ली: सर्वोच्च न्यायालयाला तीन नवीन न्यायाधीश मिळाले आहेत. केंद्रीय कायदा मंत्री अर्जुन राम मेघवाल यांनी सांगितले की, सर्वोच्च न्यायालयाच्या कॉलेजियमच्या शिफारशीवरून सरकारने न्यायमूर्ती एन.व्ही. अंजारिया, विजय बिश्नोई आणि ए.एस. चांदुरकर यांची सर्वोच्च न्यायालयाचे न्यायाधीश म्हणून नियुक्ती केली आहे. सर्वोच्च न्यायालयाच्या कॉलेजियमने सोमवारी कर्नाटक उच्च न्यायालयाचे मुख्य न्यायाधीश एन.व्ही. अंजारिया, गुवाहाटी उच्च न्यायालयाचे मुख्य न्यायाधीश विजय बिश्नोई आणि मुंबई उच्च न्यायालयाचे न्यायमूर्ती ए.एस. चांदुरकर यांची सर्वोच्च न्यायालयाचे न्यायाधीश म्हणून नियुक्ती करण्याची शिफारस केली होती.
संविधानाने दिलेल्या अधिकारांचा वापर करून, भारताच्या मुख्य न्यायाधीशांशी सल्लामसलत केल्यानंतर, राष्ट्रपती द्रौपदी मुर्मू यांनी न्यायमूर्ती एन.व्ही. अंजारिया, न्यायमूर्ती विजय बिश्नोई आणि न्यायमूर्ती ए.एस. चांदुरकर यांची सर्वोच्च न्यायालयाचे न्यायाधीश म्हणून नियुक्ती केली आहे. भारताचे माजी मुख्य न्यायाधीश संजीव खन्ना, न्यायमूर्ती अभय एस. ओका आणि न्यायमूर्ती हृषिकेश रॉय यांच्या निवृत्तीनंतर सर्वोच्च न्यायालयात न्यायाधीशांच्या सध्याच्या तीन रिक्त पदांसाठी त्यांच्या नावांची शिफारस करण्यात आली होती.
कोण आहेत न्यायमूर्ती एन.व्ही. अंजारिया?
न्यायाधीश एन.व्ही. अंजारिया यांनी ऑगस्ट 1988 मध्ये वरिष्ठ वकील एस.एन. शेलत यांच्या मार्गदर्शनाखाली गुजरात उच्च न्यायालयात प्रॅक्टिस सुरू केली. त्यांनी संवैधानिक, दिवाणी, कामगार आणि सेवा बाबी हाताळल्या आणि विविध राज्य संस्थांसाठी स्थायी वकील म्हणून काम केले. 21 नोव्हेंबर 2011 रोजी त्यांची गुजरात उच्च न्यायालयाचे अतिरिक्त न्यायाधीश म्हणून नियुक्ती झाली आणि 6 सप्टेंबर 2013 रोजी ते कायमचे न्यायाधीश झाले. 25 फेब्रुवारी 2024 रोजी त्यांनी कर्नाटक उच्च न्यायालयाचे मुख्य न्यायाधीश म्हणून शपथ घेतली.
हेही वाचा - 'तक्रारी निराधार आहेत...'; SEBI च्या माजी प्रमुख माधवी पुरी बुच यांना मोठा दिलासा
न्यायाधीश विजय बिश्नोई -
दरम्यान, न्यायाधीश विजय बिश्नोई यांची 8 जुलै 1989 रोजी वकिली म्हणून नोंदणी झाली. त्यांनी राजस्थान उच्च न्यायालय आणि जोधपूर येथील केंद्रीय प्रशासकीय न्यायाधिकरणात दिवाणी, फौजदारी, संवैधानिक, सेवा आणि निवडणूक प्रकरणांसह विविध प्रकरणे हाताळली आहेत. त्यांनी केंद्र सरकारचे स्थायी वकील म्हणून काम केले असून राजस्थान सरकारच्या विविध विभागांचे प्रतिनिधित्व केले आहे.
हेही वाचा - इंडिगोला मिळाले नवे अध्यक्ष! माजी IAS विक्रम सिंग मेहता यांनी स्विकारला पदभार
न्यायाधीश अतुल एस चांदुरकर -
याशिवाय, न्यायाधीश अतुल एस चांदुरकर यांनी 21 जुलै 1988 रोजी वकिलीमध्ये प्रवेश घेतला आणि मुंबईतील वरिष्ठ वकील बी.एन. नाईक यांच्या दालनात त्यांच्या वकिली कारकिर्दीला सुरुवात केली. 21 जून 2013 रोजी त्यांची मुंबई उच्च न्यायालयाचे अतिरिक्त न्यायाधीश म्हणून नियुक्ती झाली.