Health Tips For Back Pain : सध्या सर्वांची जीवनशैली खूपच धावपळीची झाली आहे. तसेच, बैठ्या कामांचे प्रमाण वाढले आहे. सतत बसून काम करणे, जास्त वजन उचलणे किंवा चुकीच्या पद्धतीने झोपणे यामुळे हल्ली कमरेच्या आणि पाठीच्या आजारांचे प्रमाण मोठ्या प्रमाणावर वाढले आहे. या वेदना सुरुवातीला किरकोळ वाटत असल्या तरी योग्य उपचार न केल्यास त्या गंभीर स्वरूप धारण करू शकतात. वेदना कमी असतानाच यावर घरगुती उपाय काय करावे, हे जाणून घेऊ..
वर्क फ्रॉम होम या पद्धतीमुळे त्याचबरोबर ऑफिसमध्ये तासनतास बसून काम करणाऱ्या व्यक्तींमध्ये तर हा त्रास आढळतोच. पण हल्ली ग्रामीण भागात राबणाऱ्या शेतकऱ्यांमध्येही हा त्रास आढळतो. या सर्व त्रासांसाठी सध्या कामांच्या पद्धतींसोबतच आहार हाही एक महत्त्वाचा मुद्दा ठरत आहे. यावर अनेकदा सोपा मार्ग म्हणून कमरेच्या आणि पाठीच्या दुखण्यावर तात्पुरत्या वेदनाशामक गोळ्यांचा इलाज केला जातो.
हेही वाचा - 'हाय यूरिक अ‍ॅसिड'मुळे सांध्यांमध्ये होतात असह्य वेदना, ही लक्षणं ओळखली तर संधिवात आटोक्यात ठेवणं सोपं
गरम दुधात हळद घालून पिणं
वेदनाशामक औषधे हे तात्काळ उपाय देणारे पर्याय वाटत असले तरी ते दीर्घकाळासाठी वाईट परिणाम करतात. सुरुवातीला दुखणे कमी असताना काही नैसर्गिक आणि घरगुती उपाय खरोखर चांगले ठरू शकतात. रोज रात्री झोपण्याआधी गरम दुधात हळद घालून पिणं, यामुळे शरीरातील सूज कमी होते आणि सांधेदुखीवर आराम मिळतो. तसेच गरम पाण्याची पिशवी कमरेवर 10–15 मिनिटं ठेवल्यास स्नायू सैल होतात आणि वेदना कमी होते.
तिळाचं तेल
तिळाचं तेल स्नायूंच्या सर्व प्रकारच्या दुखण्यांवर खूप चांगला परिणाम करतं. हे तेल थोडं गरम करून हलक्या हाताने मालीश केल्यानेही कमरेला आराम मिळतो. विशेषतः खोबरेल तेलात लसूण परतून तयार केलेलं तेल दुखणाऱ्या भागावर लावल्यास फार चांगला फरक जाणवतो. हे तेल नियमित वापरल्यास जुनाट पाठीदुखीही कमी होते, असं अनेकांनी अनुभवले आहे. त्यामुळे अशा घरगुती उपायांनी फरक पडतो, असं आयुर्वेदिक तज्ज्ञ सांगतात.
योगासने
योगासने करणे हा सुद्धा कोणत्याही दुंखण्यांवर उपयोगी ठरणारा पर्याय आहे. भुजंगासन, मकरासन, शलभासन ही पाठीला बळकटी देणारी आणि रक्ताभिसरण सुधारणारी आसने आहेत. ही आसने रोज फक्त 10 मिनिटं केल्यानेही कंबर आणि पाठदुखीवर प्रभावीपणे परिणाम होतो. हे उपाय नियमित केल्यास औषधांवरील अवलंबित्वही टाळता येतं.
हेही वाचा - Office Stress : कामामुळे ताण वाढतोय? फक्त 10 मिनिटे करा ही 3 योगासने; लगेच मिळेल आराम
गंभीर स्थितीत वैद्यकीय उपचार महत्त्वाचे
जर त्रास सतत वाढत असेल, पायाला सुन्नपणा जाणवत असेल किंवा चालताना त्रास होऊ लागला, तर तात्काळ डॉक्टरांचा सल्ला घ्यावा. घरगुती उपाय हे सुरुवातीच्या टप्प्यावर प्रभावी असले तरी गंभीर स्थितीत वैद्यकीय उपचार महत्त्वाचे असतात.
(Disclaimer : ही माहिती केवळ सामान्य ज्ञानासाठी प्रदान केली आहे. जय महाराष्ट्र या माहितीची कोणतीही हमी देत नाही. आरोग्यविषयक कोणताही निर्णय घेण्यापूर्वी तज्ज्ञ किंवा डॉक्टरांचा सल्ला घ्या.)