Cancer Fighting Fruit : किवी हे चिकू किंवा मध्यम आकाराच्या पेरूच्या आकाराचे फळ आहे. त्याचे फायदे प्रचंड आहेत. दररोज 1-2 किवी खाणे तुमच्या आरोग्यासाठी वरदान ठरू शकते. हे फळ कर्करोग रोखण्यासाठी देखील उपयुक्त आहे, असे आहारतज्ज्ञांचे मत आहे.
किवी हे बाहेरून चिकूच्या रंगाचे तर आतून हिरवे, आंबट-गोड चवीचे रसाळ फळ आहे. परंतु, त्याचे फायदे प्रचंड आहेत. ते केवळ चवीलाच चांगले नाही तर, आरोग्यासाठीदेखील खूप फायदेशीर आहे. जर तुम्ही दररोज दोन किवी खाल्ले तर, तुमच्या पोटाच्या अनेक समस्या दूर होऊ शकतात, असे तज्ज्ञांचे म्हणणे आहे. याच्यामुळे पचन सुधारण्यासोबतच शरीराला आवश्यक जीवनसत्त्वे आणि अँटिऑक्सिडंट्स देखील मिळतात. हे फळ कर्करोगाचा धोका कमी करण्यास देखील मदत करते.
हेही वाचा - जपानमध्ये बनवले जांभळ्या रंगाचे कृत्रिम रक्त; लाखो जीव वाचवणारे गेम चेंजर ठरेल?
किवीच्या फळाची खासियत काय आहे?
एका किवीमध्ये सुमारे 8 ग्रॅम फायबर असते, जे बद्धकोष्ठतेपासून मुक्त होते आणि शौचविधी सुलभ करते. त्यात एक विशेष एंजाइम 'अ‍ॅक्टिनिडिन' असते, जे अन्नातील प्रथिने लवकर पचवण्यास मदत करते. हे एंजाइम इतके प्रभावी आहे की ते मांस मऊ करण्यासाठी देखील वापरले जाते.
संशोधन काय आढळले?
2022 मध्ये, न्यूझीलंड, इटली आणि जपानमधील शास्त्रज्ञांनी केलेल्या एका अभ्यासात (संदर्भ) असे आढळून आले की दररोज 2 किवी खाल्ल्याने लोक वेळेवर आणि सहजपणे शौचालयात जाऊ लागले. पोटदुखी, गॅस आणि शौचविधी करण्यात अडचणी येणे म्हणजेच, बद्धकोष्ठता यासारख्या समस्या कमी झाल्या. किवी वाळलेल्या प्लम आणि फायबर सप्लिमेंट्सपेक्षा अधिक प्रभावी असल्याचे सिद्ध झाले आहे. किवीमध्ये असलेले फायबर मल मऊ करते. त्यामुळे पोट साफ करण्यास मदत होते.
कर्करोग रोखण्यास देखील उपयुक्त
2011 च्या नॉर्वेजियन अभ्यासानुसार, किवी खाल्ल्याने DNA डॅमेज होण्याची शक्यता कमी होते. यामुळे कर्करोगाची शक्यताही कमी होते. 2023 च्या एका चिनी अभ्यासात असे आढळून आले आहे की जे लोक किवी खातात, त्यांना कोलोरेक्टल कर्करोगाचा धोका 13% कमी असतो. किवीमध्ये व्हिटॅमिन सी, ई, के आणि अँटीऑक्सिडंट्स असतात, जे शरीराला कर्करोग, हृदयविकाराचा झटका आणि मधुमेहापासून देखील वाचवतात.
हेही वाचा - सूर्यस्नानानंतर आता 'वनस्नाना'चा ट्रेंड वाढतोय.. तुम्हाला माहीत आहेत का याचे फायदे?
किवी कसे खावे?
तुम्ही हे फळ दिवसाच्या कोणत्याही वेळी खाऊ शकता. किवी नेहमी सालासहित खावे. कारण त्यात जास्त फायबर असते. याच्यामुळेच पोटाच्या तक्रारी कमी होतात. तुम्ही हे इतर फळांसोबतही खाऊ शकता. याचे सॅलड बनवायचे असल्यास टोमॅटो, काकडी आणि एवोकॅडो मिसळता येईल. तसेच, ते अंड्यांसह साइड डिश म्हणूनही खाता येईल.
हे लक्षात ठेवा
फक्त किवी खाल्ल्याने चमत्कार होणार नाहीत. याच्यासोबत संतुलित आहार घेणेही आवश्यक आहे. यासोबतच दररोज इतर फळे, भाज्या, डाळी खाव्यात. जर पोटाची समस्या गंभीर असेल तर, नक्कीच डॉक्टरांचा सल्ला घ्या.
(अस्वीकरण: ही बातमी फक्त सामान्य माहितीसाठी आहे. ती कोणत्याही प्रकारे कोणत्याही औषधाचा किंवा उपचाराचा पर्याय असू शकत नाही. जय महाराष्ट्र त्याच्या सत्यतेची, अचूकतेची आणि परिणामकारकतेची हमी देत नाही. अधिक माहितीसाठी आहारतज्ज्ञ किंवा डॉक्टरांशी संपर्क साधा.)