मुंबई: मुंबईतील न्यायालयाने भाजप नेते व माजी खासदार गोपाळ शेट्टी आणि पक्ष कार्यकर्ते गणेश खणकर यांना 2004 मधील पोलिसांवरील हल्ल्याच्या प्रकरणात निर्दोष मुक्त केले आहे. या प्रकरणात दोघांवर कस्तुरबा मार्ग पोलिस ठाण्यात घुसखोरी, शिवीगाळ, धमकी व सरकारी कामात अडथळा निर्माण केल्याचा आरोप ठेवण्यात आला होता. 19 जुलै रोजी अतिरिक्त सत्र न्यायाधीश सत्यनारायण नावंदर यांनी दिलेल्या निकालात स्पष्ट करण्यात आले की, सरकारी पक्षाचे पुरावे कमकुवत, विरोधाभासी व अविश्वसनीय होते.
न्यायालयाने नमूद केले की, ठोस पुरावे नसल्याने गोपाळ शेट्टी आणि गणेश खणकर यांना संपूर्णपणे निर्दोष घोषित करण्यात येत आहे. तथापी, फिर्यादी पक्षाच्या म्हणण्यानुसार, भाजप कार्यकर्ते नेताजी शिंदे यांना 9 सप्टेंबर 2004 रोजी चौकशीसाठी कांदिवली येथील कस्तुरबा मार्ग पोलिस ठाण्यात नेण्यात आले. भाजप नेते गोपाळ शेट्टी आणि गणेश खणकर यांनी त्याच रात्री उशिरा पोलिस ठाण्यात घुसल्याचा आरोप आहे. एका पोलिस कॉन्स्टेबलने त्यांना विचारले की तुम्ही कोण आहात, तेव्हा त्या दोघांनी त्याला बाजूला ढकलले आणि शिवीगाळ केली. तसेच त्याला धमकी दिली.
त्यानंतर ते डिटेक्शन रूममध्ये घुसले. त्यांनी तिथे उपस्थित असलेल्या अधिकाऱ्याशी गैरवर्तन केल्याचा आरोप आहे. दुसऱ्या दिवशी त्यांच्याविरुद्ध भारतीय दंड संहितेच्या कलम 353 (सरकारी सेवकाला त्याचे कर्तव्य बजावण्यापासून रोखण्यासाठी हल्ला किंवा गुन्हेगारी बळजबरी), 189 (सरकारी सेवकाला दुखापत करण्याची धमकी), 504 (शांतता भंग करण्याच्या उद्देशाने जाणूनबुजून अपमान) आणि 506 (गुन्हेगारी धमकी) अंतर्गत गुन्हा दाखल करण्यात आला.
हेही वाचा - व्हॉट्सअ‍ॅप ग्रुपमध्ये मराठी वापरल्याने नवी मुंबईत 20 वर्षीय विद्यार्थ्यावर 4 मित्रांचा हल्ला
खटल्यादरम्यान, तक्रारदार असलेल्या कॉन्स्टेबलने न्यायालयात सांगितले की, त्याला धक्काबुक्की करण्यात आली आणि शिवीगाळ करण्यात आली. परंतु उलटतपासणी दरम्यान त्याने सांगितले की, धक्काबुक्की कदाचित अनावधानाने झाली असेल. कारण आरोपी घाईत होता. कॉन्स्टेबलला आरोपीने वापरलेली नेमके शिवीगाळ देखील आठवत नव्हती. न्यायालयाला त्याची साक्ष अत्यंत कमकुवत आणि अविश्वसनीय आढळली. शिवाय, तपास अधिकाऱ्याने केवळ तपास करण्याबद्दल आणि आरोपपत्र दाखल करण्याबद्दल साक्ष दिली. घटना घडली तेव्हा उपस्थित असतानाही स्वतःचा अपमान करण्यात आला किंवा धमकावण्यात आल्याच्या आरोपांना पुष्टी दिली नाही.
हेही वाचा - हर्षल पाटील मृत्यू प्रकरणावर ट्वीटर वॉर; भाजपला राजू शेट्टींचं रोखठोक उत्तर
दरम्यान, न्यायालयाने असे नमूद केले की फिर्यादी खटल्याला अंशतः पाठिंबा देणारा एकमेव साक्षीदार कॉन्स्टेबल होता. त्याची साक्ष उलटतपासणी दरम्यान विरोधाभासी, अस्पष्ट आणि कमकुवत होती. परिणामी न्यायालयाने शेट्टी यांची निर्दोष मुक्तता केली. गोपाळ शेट्टी हे 2014 ते 2024 दरम्यान मुंबई उत्तरचे खासदार होते.