विजय चिडे, प्रतिनिधी, छत्रपती संभाजीनगर: छत्रपती संभाजीनगरमधून देवदर्शन करुन सोलापूरला मध्यरात्री परत जाणाऱ्या शिक्षकांची कार दुभाजकाला धडकल्याने कारने थेट पेट घेतल्याची धक्कादायक घटना घडली. ही घटना रविवारी रात्री अडीच वाजेच्या सुमारास धुळे- सोलापूर राष्ट्रीय महामार्गावरील मुरमा शिवारात फौजी हॉटेल समोर घडली. कारमधील सुरेश उटगीकर,सागर रामपुरे, तुकाराम मुचंडे, विठ्ठल शिवशेठी, बाबू पवार अशी अपघातामध्ये जखमी झालेल्या व्यक्तींची नावे आहेत.
सध्या श्रावण सोमवार असल्याने सोलापूर येथून सुरेश उटगीकर, सागर रामपुरे, तुकाराम मुचंडे, विठ्ठल शिवशेठी आणि बाबू पवार हे पाच शिक्षक छत्रपती संभाजीनगर जिल्ह्यातील वेरुळच्या बारावे ज्योतिर्लिंग असलेल्या घृष्णेश्वर मंदिरात दर्शनासाठी आले होते. रात्री बारा वाजता हे सर्व शिक्षक भाविक घृष्णेश्वराचे दर्शन घेऊन टाटा पंच कार (क्रमांक एम एच 13 ई के 5870) हीने सोलापूरकडे परतत असताना धुळे- सोलापूर राष्ट्रीय महामार्गावरील मुरमा शिवारातील हॉटेल फौजीसमोर कार चालकांचे कारवरुन नियंत्रण सुटल्याने कार थेट महामार्गावरील दुभाजकाला धडकली आहे.
हेही वाचा: Washim: रुग्णालयाच्या निष्काळजीपणामुळे नवजात बालकाचा मृत्यू; कुटुंबियांचा रुग्णालयावर गंभीर आरोप
कार दुभाजकाला धडकल्यानंतर कारने काही क्षणांमध्येच मोठा पेट घेतला होता. हा अपघात झाल्याची माहिती स्थानिकांना मिळतात त्यांनी तातडीने घटनास्थळी दाखल होऊन कारमधील जखमींना तातडीने कारबाहेर काढले. या घटनेची माहिती भोकरवाडी येथील टोल नाक्यावरील रुग्णवाहिकला दिले. यानंतर रुग्णवाहिकेवरील कर्मचारी महेश जाधव,आत्माराम गाढे, रवी गाढे यांनी ताबडतोब घटनास्थळी दाखल होऊन सर्व जखमींना तातडीने ग्रामीण रुग्णालयात उपचारासाठी दाखल केले. पाचोड येथील रुग्णालयात जखमींवर उपचार सुरु आहेत. वैद्यकीय अधिकारी डॉ. संदीपान काळे यांनी त्या जखमींवर प्राथमिक उपचार करुन जखमींना तात्काळ छत्रपती संभाजीनगर येथील घाटी रुग्णालयात उपचारासाठी हलविण्यात आले आहे. या अपघाताची नोंद पाचोड पोलीस ठाण्यात करण्यात आली असून पुढील तपास सहाय्यक पोलीस निरीक्षक सचिन पंडित यांच्या मार्गदर्शनाखाली पोलीस उपनिरीक्षक गोविंद राऊत करत आहेत.