मुंबई: शरद पवार गटाच्या महिला प्रदेशाध्यक्षा रोहिणी खडसे यांनी गुरुवारी संध्याकाळी एक एक्स पोस्ट केली, ज्यामध्ये उपमुख्यमंत्री एकनाथ शिंदे यांच्या कार्यालयाजवळ कचऱ्याच्या ढिगाऱ्याचा व्हिडिओ स्पष्टपणे दिसत होता. हा व्हिडिओ व्हायरल होताच, उपमुख्यमंत्री एकनाथ शिंदे यांच्या कार्यालयाच्या बाजूला साचलेला कचरा पांढऱ्या कपड्याने झाकण्यात आला.
हेही वाचा: शिंदेंच्या ऑफिसबाहेर कचऱ्याचा ढीग; 'जय महाराष्ट्र'च्या प्रतिनिधीवर अधिकाऱ्याची अरेरावी
रोहिणी खडसेंची एक्स पोस्ट
'लपवालपवी अशीही लपवालपवी! विधानभवनात उपमुख्यमंत्री एकनाथ शिंदे यांच्या दालनात बाजूला साचलेला कचरा नंतर अशाप्रकारे पांढरे कपडे लावून झाकण्यात आला', अशी माहिती शरद पवार गटाच्या महिला प्रदेशाध्यक्षा रोहिणी खडसे यांनी शुक्रवारी सकाळी केली.
विधानभवनाचा 'कचरा' करू नका
पुढे, रोहिणी खडसेंनी एक्स पोस्ट करत सत्ताधाऱ्यांवर टीका केली. 'अरे सत्ताधाऱ्यांनो! विधानभवनाचा 'कचरा' करू नका. काल विधानभवनात उपमुख्यमंत्री महोदयांच्या कार्यालयाच्या बाजूला कचरा साचला असल्याचे निदर्शनास आले होते. आज दुसरा दिवस उजाडला तरी त्या कचऱ्याची विल्हेवाट लावली जात नाही. उलट माध्यम प्रतिनिधी याबाबत वृत्तांकन करत असताना त्यांना ताब्यात घेतले जात आहे. साधा कचरा उचलला जात नसेल तर अधिवेशनासाठी केला जाणारा करोडोंचा खर्च जातो कुठे? @CMOMaharashtra @mieknathshinde @AjitPawarSpeaks #Monsoon2025 #पावसाळी_अधिवेशन #Maharashtra #MaharashtraPolitics', अशी सडेतोड टीका रोहिणी खडसेंनी केली.
काय म्हणाल्या रोहिणी खडसे?
शरद पवार गटाच्या महिला प्रदेशाध्यक्ष रोहिणी खडसे यांनी गुरुवारी सायंकाळी एक्सवर पोस्ट केली, ज्यात त्यांनी एकनाथ शिंदे यांच्या कार्यालयाच्या बाजूला असलेला कचऱ्याचा ढीग दाखवला आहे.
'सध्या राज्याचे विधिमंडळ अधिवेशन सुरू आहे मात्र विधिमंडळ परिसरात मोठ्या प्रमाणात कचरा साचला आहे. आश्चर्याची बाब म्हणजे मा. उपमुख्यमंत्री @mieknathshinde यांच्या दालनापासून अवघ्या 50 फुटांवर हा कचऱ्याचा ढीग आहे. आज सकाळी माध्यमांनी विधीमंडळ परिसरात मोठ्या प्रमाणात कचरा साचला आहे ही बाब समोर आणली. त्यानंतर अपेक्षा होती विधिमंडळ परिसरात असलेला कचरा तत्काळ उचलला जाईल. मात्र झालं उलट यांनी आपल्या चुका लपवण्यासाठी माध्यमांना वार्तांकन करण्यापासून रोखलं आणि या ठिकाणी कचरा झाकण्यासाठी मोठे पडदे लावले. लपवाछपवी करण्यात या सरकारला अवॉर्डच दिले पाहिजे. आपल्या चुका सुधारणार नाहीत पण त्यावर पांघरूण घालण्यात हे माहीर आहेत', अशी टीका रोहिणी खडसे यांनी एक्सच्या माध्यमातून केली.