वॉशिंग्टन: आजच्या युगात आपण आपल्या अनेक प्रश्नांची उत्तरे शोधण्यासाठी Google सर्चची मदत घेतो. कधीकधी या गुगल सर्चमधून केवळ माहिती मिळत नाही, तर एखादा चमत्कारही घडू शकतो. अमेरिकेत एका सहा वर्षांच्या मुलासोबत असाच एक चमत्कार घडला आहे. डॉक्टरांनी उपचारांनंतरही हा मुलगा कधीच चालू शकणार नाही, असे म्हटले होते. पण त्याच्या आईने हार मानली नाही. तिने Google सर्चमधून मुलाच्या आजाराविषयी अधिक माहिती शोधून अखेर त्याचा जीव वाचवला.
नेमकं काय घडलं?
अचानक बिघडली तब्येत : एका आंतरराष्ट्रीय वृत्तसंस्थेच्या रिपोर्टनुसार, एप्रिल महिन्यात सहा वर्षांच्या विटन डॅनियलला अचानक चक्कर आल्यामुळे आणि डोकेदुखीमुळे रुग्णालयात दाखल करण्यात आले.
डॉक्टरांचा गैरसमज : सुरुवातीला डॉक्टरांनी त्याला 'फ्लू' झाल्याचे सांगितले. पण 24 तासांतच त्याची तब्येत अधिक बिघडली. त्याने बोलणे, चालणे आणि अगदी श्वास घेणेही थांबवले.
दुर्मिळ आजार : डॉक्टरांनी विटनला 'कॅवर्नस मालफॉर्मेशन' (Cavernous Malformation) नावाचा दुर्मिळ आजार असल्याचे सांगितले. हा आजार सुमारे 500 पैकी एका व्यक्तीला होतो. त्यांनी आईला सांगितले की, जर विटन वाचलाच, तरी तो कदाचित पुन्हा कधीच चालू शकणार नाही आणि त्याला आयुष्यभर व्हेंटिलेटर आणि फीडिंग ट्यूबवर राहावे लागेल.
हेही वाचा - Looking For Indian Husband : 'भारतीय नवराच हवा'; न्यूयॉर्कच्या 'टाईम्स स्क्वेअर'वर तरुणीची अनोखी जाहिरात
आईच्या Google सर्चने वाचवला जीव
आईने हार मानली नाही : डॉक्टरांचे निराशाजनक उत्तर ऐकूनही विटनची आई केसी डॅनियल यांनी आशा सोडली नाही. त्यांनी आपल्या मुलाच्या आजाराविषयी Google वर माहिती शोधण्यास सुरुवात केली. या आजारावरील उपचारांचा शोध घेत असताना त्यांना यूटी हेल्थ ह्यूस्टनच्या न्यूरोसर्जन डॉ. जॅक्स मोरकोस यांचा एक लेख सापडला. डॉ. मोरकोस हे कॅवर्नोमाच्या उपचारात तज्ज्ञ होते. केसी यांनी तत्काळ डॉ. मोरकोस यांना ईमेल पाठवून मदत मागितली. आश्चर्य म्हणजे, त्यांनीही लगेचच या ईमेलला उत्तर दिले.
यशस्वी शस्त्रक्रिया: त्यानंतर विटनला ह्यूस्टन येथे नेण्यात आले, जिथे डॉ. मोरकोस आणि डॉ. मनीष शाह यांनी चार तासांची एक महत्त्वाची शस्त्रक्रिया केली. ऑपरेशन पूर्णपणे यशस्वी झाले आणि काही तासांतच विटन शुद्धीवर आला. आता तो पुन्हा श्वास घेत आहे आणि बोलूही लागला आहे. या घटनेने हे सिद्ध झाले की, ज्ञानाचा योग्य वापर केल्यास काहीवेळा चमत्कारही होऊ शकतात.
हेही वाचा - Positive Parenting : आई 9 वर्षांच्या दोन जुळ्या मुलींकडून वसूल करते घरभाडे आणि इतर खर्च सुद्धा! कारण वाचून वाटेल कौतुक