Adani Group: अदानी ग्रुपने चीनी कंपन्या BYD आणि Beijing WeLion New Energy Technology यांच्यासोबत भारतात बॅटरी उत्पादनासाठी कोणतीही भागीदारी केली नसल्याचे स्पष्टपणे फेटाळून लावले आहे. ब्लूमबर्ग या आंतरराष्ट्रीय मीडिया संस्थेने 4 ऑगस्ट 2025 रोजी प्रसिद्ध केलेल्या बातमीत दावा केला होता की, अदानी ग्रुप या दोन चीनी कंपन्यांबरोबर स्ट्रॅटेजिक भागीदारी करण्याच्या तयारीत आहे. मात्र अदानी समूहाने हे वृत्त 'बिनबुडाचे, चुकीचे आणि दिशाभूल करणारे' असल्याचे सांगत पूर्णपणे नाकारले आहे.
कोणत्याही सहकार्याची शक्यता नाही- अदानी ग्रुप
अदानी एंटरप्रायझेस लिमिटेडने अधिकृत स्टॉक एक्स्चेंज फाइलिंगमध्ये म्हटले की, 'आम्ही BYD किंवा Beijing WeLion New Energy Technology यांच्यासोबत कोणतीही चर्चा किंवा सहकार्य करत नाही. आम्ही ब्लूमबर्गने दिलेल्या अहवालाचा ठाम इन्कार करतो.'
ब्लूमबर्गच्या अहवालानुसार, गौतम अदानी स्वतः या चर्चेत सहभागी असून, भारतीय बॅटरी उत्पादन क्षेत्रात भागीदारी करून स्वच्छ ऊर्जा आणि लिथियम-आयन बॅटरी निर्मितीत प्रवेश करण्याचा विचार करीत असल्याचे सांगण्यात आले होते. तसेच, चीनी कंपन्यांच्या तांत्रिक प्रगती आणि स्वस्त उत्पादन क्षमतेमुळे अदानी ग्रुप त्यांच्यासोबत करार करण्यास इच्छुक असल्याचाही उल्लेख होता.
मात्र, अदानी ग्रुपने यावर त्वरित स्पष्टीकरण देत सांगितले की, आम्ही सध्या भारताच्या स्वच्छ ऊर्जा संक्रमणाच्या दिशेने काम करत आहोत आणि त्यासाठीची प्रत्येक पायरी पारदर्शकतेने उचलत आहोत. कुठल्याही चीनी कंपनीसोबत चर्चा करण्याचा मुद्दाच नाही.
स्वच्छ ऊर्जेतील गुंतवणूक आणि योजनांचा विस्तार
अदानी ग्रुपने त्यांच्या स्वच्छ ऊर्जा पोर्टफोलिओमध्ये सातत्याने वाढ केली असून, सौर, पवन आणि ग्रीन हायड्रोजन उत्पादन या क्षेत्रात मोठ्या प्रमाणात गुंतवणूक केली आहे. समूह सध्या आपली सोलर मॉड्यूल उत्पादन क्षमता 10 GW प्रति वर्ष इतकी वाढवत आहे. याशिवाय, वाऱ्याद्वारे वीजनिर्मिती करणाऱ्या टर्बाइन उत्पादन क्षमतेतही वाढ करून ती 5 GW पर्यंत नेण्याचे उद्दिष्ट आहे.
ग्रीन हायड्रोजन निर्मितीसाठी आवश्यक असलेल्या इलेक्ट्रोलायझर उपकरणांच्या निर्मिती प्रकल्पाची तयारीही अदानी ग्रुपकडून सुरू आहे. त्यामुळे त्यांच्या हरित ऊर्जा मिशनला आणखी बळकटी मिळणार आहे.
BYD आणि Beijing WeLion या चीनच्या कंपन्यांबरोबर भागीदारीसंबंधीच्या चर्चांना फेटाळत अदानी ग्रुपने एक संदेश दिला आहे – भारतातील स्वच्छ ऊर्जा उद्दिष्टांवरच आमचे संपूर्ण लक्ष आहे. बाह्य भागीदारींबाबत कोणताही निर्णय घेताना पारदर्शकता आणि राष्ट्रीय हित लक्षात घेऊनच पुढे पाऊल टाकले जाईल, असे संकेत अदानी ग्रुपच्या भूमिकेतून दिसून येतात.