हरियाणा: हरियाणातील पंचकुला शहरात एक अत्यंत धक्कादायक आणि मन हेलावून टाकणारी घटना घडली आहे. डेहराडूनहून आलेल्या एका कुटुंबातील सात जणांनी आत्महत्या केल्याची माहिती समोर आली असून, आर्थिक संकटामुळे हे टोकाचे पाऊल उचलले असावे, असा प्राथमिक अंदाज आहे. या घटनेमुळे परिसरात हळहळ व्यक्त होत आहे.
मृतांमध्ये प्रविण मित्तल, त्यांची पत्नी रीना, आई विमला, वडील देशराज, 11 वर्षांच्या जुळ्या मुली ध्रुविका आणि दलिशा, तसेच 14 वर्षांचा मुलगा हार्दिक यांचा समावेश आहे. हे सर्वजण एका ह्युंदाई कारमध्ये मृतावस्थेत आढळून आले. प्राथमिक तपासात विषप्राशन केल्याचे संकेत मिळाले आहेत. पोलिसांनी कारमधून दोन पानांचे सुसाइड नोट जप्त केली आहे. त्यामध्ये प्रविणने लिहिले आहे, 'मी दिवाळखोर झालो आहे. या सर्व गोष्टींसाठी मी जबाबदार आहे. माझ्या सासऱ्याला त्रास देऊ नका. माझ्या कुटुंबाच्या अंत्यसंस्कारांची जबाबदारी माझ्या चुलत भावाने घ्यावी.'
हेही वाचा: राज्यातील सर्व केंद्रीय कार्यालये, बँकांमध्ये मराठी भाषा अनिवार्य; केंद्र सरकारचा निर्णय
पोलिसांनी दिलेल्या माहितीनुसार, प्रविण मित्तल यांनी डेहराडूनमध्ये टूर अँड ट्रॅव्हल्स व्यवसाय सुरू केला होता, मात्र त्यात त्यांना मोठे आर्थिक नुकसान झाले. नंतर ते पंचकुलामधील मानसा देवी कॉम्प्लेक्समध्ये भाड्याच्या घरात राहत होते. आर्थिक अडचणीमुळे त्यांनी जवळपास एक कोटी रुपयांचे कर्ज घेतले होते आणि बँकेकडून त्यांना प्रोक्लेम्ड ऑफेंडर घोषित करण्यात आले होते.
घटनेची माहिती मिळाल्यानंतर उपायुक्त हिमाद्री कौशिक, सहाय्यक पोलिस आयुक्त विक्रम नेहरा यांच्यासह वरिष्ठ अधिकारी घटनास्थळी पोहोचले आणि नंतर मृतदेह रुग्णालयात पाठवण्यात आले. पोलिसांनी मृतांच्या नातेवाइकांचे जबाब नोंदवले असून, सर्व बाजूंनी तपास सुरू आहे.
घटनेच्या रात्री सेक्टर 27 मधील रहिवासी हर्ष यांनी सर्वप्रथम ही कार पाहिली. त्यांनी सांगितले की, कारमध्ये काही लोक बसलेले दिसले आणि मागील काचेला टॉवेल लावलेला होता. शंका आल्याने त्यांनी जवळ जाऊन पाहिले असता कारमध्ये उलट्या झाल्याचे दिसले. प्रविण मित्तल अर्धवट शुद्धीत होते. त्यांनी सांगितले की त्यांनी आणि त्यांच्या कुटुंबाने विषप्राशन केले आहे. त्यानंतर हर्ष यांनी पोलिसांना माहिती दिली आणि सर्वांना तातडीने रुग्णालयात नेण्यात आले.
ही घटना केवळ आर्थिक संकटाचे भयावह स्वरूप दाखवतेच, पण मानसिक आरोग्याबद्दल जागरूकतेचीही गरज अधोरेखित करते. एक संपूर्ण कुटुंब आत्महत्येसारख्या टोकाच्या निर्णयावर पोहोचणे ही समाजासाठी गंभीर चिंतेची बाब आहे. प्रशासनाकडून सखोल चौकशी सुरू असून, अशी दुर्दैवी पुनरावृत्ती टाळण्यासाठी मानसिक आरोग्य आणि आर्थिक सल्ला केंद्रांची गरज अधोरेखित होत आहे.