अमरावती : समाजवादी पक्षाचे आमदार अबू आझमी यांनी औरंगजेब क्रूर प्रशासक नव्हता, असे म्हटले होते. औरंगजेब (Aurangzeb) हा उत्तम प्रशासक होता. त्याच्या राजवटीत भारताची सीमा ही अफगाणिस्तान आणि बर्मा देशापर्यंत होती, असे वक्तव्य समाजवादी पक्षाचे आमदार अबू आझमी(Abu Azmi) यांनी केले. त्यांच्या या विधानावर अनेकांनी संतप्त प्रतिक्रिया दिली आहे आणि या वक्तव्यावरुन राज्यभरात वादंग निर्माण झाला आहे. दरम्यान याच प्रकरणावरून अमरावतीच्या माजी खासदार आणि भाजप नेत्या नवनीत राणा (Navneet Rana) यांनी अबू आझमींवर सडकून टीका केली आहे.
अबू आझमी म्हणाले होते की, ‘चुकीचा इतिहास दाखवला जात आहे. औरंगजेबाने अनेक मंदिरे बनवलेली आहेत. मी औरंगजेबाला क्रूर प्रशासक मानत नाही. तसेच छत्रपती संभाजी महाराज आणि औरंगजेब यांच्यातील जी लढाई होती, ती राज्य कारभाराची होती आणि हिंदू-मुस्लिम अशी नव्हती. मी असे मानतो की, औरंगजेबाच्या काळात भारताची सीमा अफगाणिस्तानपर्यंत होती. त्या काळात आपला जीडीपी 24 टक्के एवढा होता. तेव्हा भारताला सोने की चिड़िया म्हटले जायचे. मग मी याला चुकीचे म्हणू का? तसेच छत्रपती संभाजी महाराज आणि औरंगजेबाची लढाई ही धर्माची होती असे मी मानत नाही.’ त्यांच्या या विधानानंतर अनेकांनी टीकेची झोड उठवली आहे.
हेही वाचा - नागपुरात बांगलादेशी विमानाचे आपत्कालीन लँडिंग; तांत्रिक अडचणींमुळे घेण्यात आला निर्णय
आता भाजपच्‍या नेत्या आणि माजी खासदार नवनीत राणा यांनी अबू आझमींच्या या वक्तव्याबद्दल संतप्त व्हिडिओ शेअर केला. नवनीत राणा म्‍हणाल्‍या की, ज्‍या पद्धतीने अबू आझमींनी हे वक्तव्य केले आहे, त्‍यांनी एकदा जाऊन छावा चित्रपट पाहून घ्‍यावा. या चित्रपटामध्‍ये जो इतिहास दाखवला आहे आणि आजवर जे आम्ही वाचलेले आहे, त्‍यात छत्रपती संभाजी महाराजांवर अत्‍याचार करणारा हा औरंगजेब हा क्रूर राजा होता, संभाजी महाराजांच्‍या डोळ्यात सळई टाकणारा औरंगजेब होता, हे सर्वांना माहीत आहे. ज्‍या प्रकारे महाराष्ट्र सरकारने औरंगाबादचे नाव बदलून छत्रपती संभाजीनगर केले, त्या सरकारने आता औरंगजेबाला बाप म्‍हणणाऱ्या लोकांना रोकठोक उत्तर दिले पाहिजे. महाराष्‍ट्रात आता हिंदुत्‍ववादी विचारांचे सरकार आहे. ज्‍या व्‍यक्‍तीने छत्रपती संभाजी महाराजांवर भयंकर अत्‍याचार केले, त्या औरंगजेबाची कबर खुलताबाद येथून उखडून फेकून दिली पाहिजे, अशी विनंती आपण सरकारला करणार आहोत.
नवनीत राणा म्‍हणाल्‍या, जो हिंदू हिताची गोष्‍ट करणार नाही, त्‍यांना या देशात राहण्‍याचा अधिकार नाही. महायुतीचे सरकार औरंगजेबाची कबर उखडून फेकणार तर आहेच, पण ज्‍यांना औरंगजेबावर प्रेम आहे, त्‍यांनी आपल्‍या घरी ती कबर न्‍यावी, अशा शब्‍दात नवनीत राणा यांनी संताप व्‍यक्‍त केला.
हेही वाचा - नागपूरमध्ये इंजिनिअरिंग विद्यार्थ्यांची कार शर्यत; पोलिसांची मोठी कारवाई
अबू आझमींवर मरीनड्राइव्ह पोलिस ठाण्यात गुन्हा दाखल आणि आमदारकी रद्द करण्याची मागणी
समाजवादी पक्षाचे आमदार अबू आझमी(Abu Azmi) यांनी औरंगजेबाविषयीच्या वक्तव्यावरुन मुंबईच्या मरीनड्राइव्ह पोलीस ठाण्यात गुन्हा दाखल करण्यात आला आहे. शिवसेना नेते आणि माजी आमदार किरण पावसकर यांनी या विषयी तक्रार दाखल करत मरीनड्राइव्ह पोलिस ठाण्यात गुन्हा दाखल करण्यात आला आहे.अबू आझमी विरोधात आम्ही मरीन ड्राईव्ह पोलीस ठाण्यात पत्र दिलं असून त्याच्या विरोधात तात्काळ देशद्रोहाचा गुन्हा दाखल करण्याची मागणी आमची आहे. हा दोन समाजात तेढ निर्माण करण्याचा प्रकार आहे. याबाबत पोलीस प्रशासनाकडून देखील सकारात्मक प्रतिसाद मिळालेला असून हे विधिमंडळ परिसरात घडले असल्याकारणाने या संपूर्ण प्रकरणाची वस्तुस्थिती समजून पुढील कायदेशीर कारवाई करण्याचा आश्वासन पोलिसांकडून देण्यात आल आहे. हे वक्तव्य समोर येताच एकनाथ शिंदे यांनी देखील हा मुद्दा गांभीर्याने घेतला असून अबू आझमी यांची आमदारकी रद्द करण्यात यावी, अशी देखील आमची मागणी आहे.