पुण्यातील अनेक भागात बत्तीगुल! केबल बिघाडामुळे वीजपुरवठा खंडित

पुणे: पुण्यातील अनेक भागाची सध्या बत्तीगुल आहे. रविवारी दुपारी भूमिगत केबलमध्ये मोठा बिघाड झाल्यानंतर महाराष्ट्र राज्य विद्युत वितरण कंपनी लिमिटेड च्या गणेशखिंड आणि पुणे ग्रामीण विभागांमध्ये मोठ्या प्रमाणात वीजपुरवठा खंडित झाल्याने 52 हजार हून अधिक वीज ग्राहकांना फटका बसला. अधिकाऱ्यांनी सांगितले की, सोमवारी सकाळी बहुतेक कमी व्होल्टेज ग्राहकांना पुरवठा पूर्ववत करण्यात आला, परंतु औद्योगिक ग्राहकांना अजूनही दीर्घकाळ व्यत्यय येत आहे. तथापि, रविवारी दुपारी 2.10 वाजता महाराष्ट्र राज्य विद्युत ट्रान्समिशन कंपनी लिमिटेड (महाट्रान्सको) ने हिंजवडी फेज-2 मेट्रो स्टेशनजवळ इन्फोसिस आणि पेगासस सबस्टेशनला जोडणाऱ्या 220 केव्ही भूमिगत लाईनची नियमित देखभाल पूर्ण केली तेव्हा हा व्यत्यय सुरू झाला. 

हिंजवडीतील प्रमुख आयटी कंपन्यांना मोठा फटका - 

अधिकाऱ्यांनी पुढे सांगितले की, बिघाडामुळे नेटवर्कच्या मोठ्या भागांना वीजपुरवठा तात्काळ खंडित झाला. हिंजवडीतील प्रमुख आयटी कंपन्यांना याचा मोठा फटका बसला. फोरम फॉर आयटी एम्प्लॉईज (एफआयटीई) ने म्हटले आहे की, बुधवारपर्यंत औद्योगिक युनिट्सना वीजपुरवठा पुन्हा सुरू होऊ शकत नाही. खबरदारीचा उपाय म्हणून, कंपन्यांनी बॅकअप पॉवर चालू केला आहे. तसेच कर्मचाऱ्यांना घरून काम करण्याची परवानगी दिली आहे. 

हेही वाचा - बालसुधारगृहातील मुलींच्या पलायन प्रकरणी राष्ट्रीय महिला आयोगाकडून सुमोटो दाखल

दरम्यान, रविवारी महावितरणने काम सुरू केले असल्याने, विप्रो सर्कल ते क्वाड्रोनपर्यंतचे रस्ते खोदण्याचे काम एका लेनपर्यंत मर्यादित करण्यात आले आहे, ज्यामुळे परिसरात वाहतूक कोंडी झाली आहे. महावितरणने काम सुरू केल्यानंतर विप्रो सर्कलजवळ मोठी वाहतूक कोंडी झाली होती. वाहतूक पूर्ववत करण्यासाठी वाहतूक पोलिसांनी 25 वाहतूक पोलिस तैनात केले आहेत. कर्मचाऱ्यांना 10 जुलैपर्यंत मान रोड वापरण्यास सांगण्यात आले आहे. 

हेही वाचा - रायगडमध्ये रेवदंडा किनाऱ्यावर आढळली संशयास्पद बोट; सागरी सुरक्षा अधिकाऱ्यांनी वाढवली सुरक्षा

वीजपुरवठा दीर्घकाळ खंडित राहिल्याने आणि स्पष्ट संपर्काच्या अभावामुळे रहिवाशांनी निराशा व्यक्त केली आहे. दरम्यान, पिंपरी विभागातील 20 हजार हून अधिक आणि मुळशी विभागातील 32 हजार हून अधिक ग्राहकांना अचानक वीजपुरवठा खंडित झाल्यामुळे मोठा त्रास सहन करावा लागला. तथापी, महावितरणने ग्राहकांना आश्वासन दिले की पूर्ण सेवा पूर्ववत करण्यासाठी पथके दिवसरात्र काम करत आहेत. या आपत्कालीन परिस्थितीत नागरिकांना आणि व्यवसायांना सहकार्य करण्याचे आणि बाधित भागातील वाहतूक आणि सुरक्षिततेच्या सूचनांचे पालन करण्याचे आवाहन अधिकाऱ्यांनी केले आहे.