AI Security Risks: आजच्या तंत्रज्ञानाच्या युगात कृत्रिम बुद्धिमत्ता (AI) आपले जीवन अधिक सोयीस्कर आणि स्मार्ट बनवत आहे. गूगलचे Gemini AI हे याच प्रवासातील एक महत्वाचे पाऊल आहे. हे AI व्हिडिओसोबत ऑडिओ तयार करू शकते, मुलांसाठी चित्रांसह पुस्तके बनवू शकते, तसेच प्रवासाची संपूर्ण योजना आखू शकते. मात्र, त्याच वेळी या AI चा एक धोकादायक पैलू देखील संशोधकांनी उघड केला असून, त्यामुळे स्मार्ट होम वापरणाऱ्यांच्या सुरक्षिततेबद्दल प्रश्नचिन्ह निर्माण झाले आहे.
सायन्स फिक्शन ते वास्तव
आपण अनेकदा चित्रपटांमध्ये पाहिले आहे की एखादी व्यक्ती दूरून घरातील लाईट्स बंद-चालू करते, तापमान नियंत्रित करते किंवा सुरक्षा कॅमेऱ्यांवर नजर ठेवते. संशोधकांनी हेच प्रत्यक्षात करून दाखवले, पण एका वेगळ्या पद्धतीने Gemini AI ला हॅक करून. त्यांनी दाखवून दिले की, जर AI ला घरातील स्मार्ट डिव्हाइसशी जोडले, तर केवळ सोयीसाठीच नाही तर गंभीर नुकसानासाठीसुद्धा ते वापरले जाऊ शकते.
हेही वाचा: आता भारतात या राज्यांत AI ट्रॅफिक सिग्नल बसवले जाणार; जाणून घ्या, कसे काम करतील..
Google Calendar द्वारे स्मार्ट होमवर हल्ला
WIRED च्या अहवालानुसार, संशोधकांच्या टीमने Android फोनवरील Gemini Assistant ला Google Calendar च्या इन्व्हाइटद्वारे हॅक केले. या इन्व्हाइटमध्ये धोकादायक कोड लपवलेला होता. Gemini ला फक्त त्या कॅलेंडर इव्हेंटचे सार सांगण्यास सांगितले, आणि कोड सक्रिय झाला. परिणाम असा झाला की घरातील सर्व स्मार्ट डिव्हाइसवर त्याचा ताबा मिळाला. अशा प्रकारे साध्या दिसणाऱ्या कॅलेंडर आमंत्रणाचा वापर करून संपूर्ण स्मार्ट होम सिस्टमवर नियंत्रण मिळवणे शक्य झाले.AI चा धोकादायक विस्तार
स्मार्ट डिव्हाइस आधीपासूनच सायबर हल्ल्यांच्या निशाण्यावर असतात. परंतु आता LLMs (लार्ज लँग्वेज मॉडेल्स) सारख्या अत्याधुनिक AI साधनांमुळे हा धोका अनेक पटींनी वाढला आहे. जर AI चुकीच्या हातात गेले, तर त्याचा वापर केवळ माहिती चोरीसाठीच नाही तर थेट भौतिक नुकसानासाठीही केला जाऊ शकतो उदा. सुरक्षा कॅमेरे बंद करणे, दारांचे लॉक उघडणे किंवा तापमानात धोकादायक बदल करणे.
हेही वाचा: व्हॉट्सअॅपची सायबर गुन्हेगारांवर कारवाई! बनावट नोकरीच्या ऑफर देणारे 68 लाख अकाउंट डिलीट
गूगलची प्रतिक्रिया आणि भविष्यातील आव्हाने
हा धोकादायक डेमो गूगलपर्यंत पोहोचवण्यात आला. गूगलने मान्य केले की अशा प्रकारचा ताबा स्मार्ट डिव्हाइसवर मिळवणे धोकादायक आहे. कंपनीचे म्हणणे आहे की, अद्याप या कमकुवतपणाचा प्रत्यक्ष गैरवापर झालेला नाही, पण त्यावर उपाययोजना सुरू आहेत.
गूगल पुढील काळात Gemini ला स्मार्टवॉच, स्मार्ट टीव्ही, अगदी कारमध्येही समाविष्ट करण्याची योजना आखत आहे, ज्याची घोषणा 2025 मध्ये करण्यात आली होती. यामुळे AI आपल्या जीवनाच्या जवळजवळ प्रत्येक कोपऱ्यात पोहोचणार आहे.
मात्र, याचबरोबर सुरक्षा पातळी किती मजबूत केली जाते, हे महत्त्वाचे ठरणार आहे. अन्यथा, सोयीचे साधन म्हणून तयार झालेले हे तंत्रज्ञान, एका चुकीच्या क्लिकमुळे, आपल्या सुरक्षेसाठी सर्वात मोठा धोका बनू शकते.