Oil Free Potato Chips:आजकाल हेल्दी स्नॅकिंगची फॅशन वाढत चालली आहे. पॅकेटमध्ये मिळणारे चिप्स, स्नॅक्स किंवा फास्ट फूडमध्ये तेल, मीठ आणि केमिकल्सचे प्रमाण जास्त असल्याने ते शरीरासाठी घातक ठरतात. पण जर तुम्हाला चव आणि आरोग्य दोन्ही सांभाळायचं असेल, तर घरच्या घरी तेलाशिवाय खमंग बटाट्याचे चिप्स हा उत्तम पर्याय ठरू शकतो. हे चिप्स बनवायला फक्त 10 मिनिटं लागतात आणि चविष्ट इतके की मुले असो वा मोठे सगळेच खुश होतील.
आरोग्यदायी पर्याय
बाजारातील तळलेले चिप्स जास्त प्रमाणात खाल्ले तर वजन वाढणे, कोलेस्टेरॉलची समस्या किंवा पचनाच्या तक्रारी वाढण्याची शक्यता असते. त्यामुळे आता लोक हेल्दी स्नॅक्सकडे वळताना दिसत आहेत. विशेषतः ऑइल-फ्री रेसिपीज लोकप्रिय होत आहेत. बटाट्याचे चिप्स तेलाशिवाय बनवले तरी कुरकुरीत आणि चविष्ट लागतात, त्यात तेलाचा त्रासही टाळता येतो.
हेही वाचा: Mishti Doi Recipe : बंगालची प्रसिद्ध मिष्टी दोई रेसिपी आता बनवा घरच्या घरी; जाणून घ्या
साहित्य आणि तयारी
तेलाशिवाय बटाट्याचे चिप्स बनवण्यासाठी तुम्हाला जास्त साहित्याची गरज नसते. फक्त काही बटाटे, मीठ, मिरची पूड आणि हवे असल्यास थोडं लिंबूरस एवढं पुरेसं आहे. बटाटे नीट धुऊन, सोलून अतिशय बारीक कापावे. काप जितके बारीक तितके चिप्स अधिक कुरकुरीत होतात.
यानंतर हे काप थंड पाण्यात 10-15 मिनिटं भिजत ठेवा. त्यामुळे त्यातील अतिरिक्त स्टार्च निघून जातो आणि चिप्स अधिक खमंग होतात. भिजवलेले काप स्वच्छ कापडावर किंवा पेपर टॉवेलवर पसरवून नीट कोरडे करावेत. ओलसर स्लाइस एअर फ्रायरमध्ये ठेवले तर ते नरम राहतील, म्हणून ते पूर्णपणे कोरडे होणं आवश्यक आहे.
मसाला आणि शिजवण्याची प्रक्रिया
कोरडे केलेल्या स्लाइसवर मीठ, काळी मिरी पावडर आणि थोडी लाल मिरची पावडर शिंपडावी. थोडासा लिंबूरस टाकला तर चव अधिक छान लागते. आता एअर फ्रायर 180°C वर प्री-हीट करा आणि बटाट्याचे काप एकाच थरात बास्केटमध्ये पसरवा. स्लाइस एकमेकांवर चढले नाहीत याची काळजी घ्या.
हेही वाचा: Shardiya Navratri 2025:'या' सोप्या पद्धतीने उपवासासाठी बनवा कुरकुरीत आणि स्वादिष्ट साबूदाणा वडे
फक्त 10 मिनिटांत हे स्लाइस कुरकुरीत आणि सोनसळी रंगाचे होतील. मध्ये ५ मिनिटांनी बास्केट हलकं हलवून घ्यावं, जेणेकरून सर्व काप सारखेच शिजतील. चिप्स एअर फ्रायरमधून बाहेर काढून थोडावेळ गार झाल्यावर खायला द्या.
का करावा हा प्रयत्न?
– कमी वेळेत तयार होतात.
– तेलाशिवाय असल्याने वजन आणि कोलेस्टेरॉल वाढत नाही.
– बाजारातील पॅकेज्ड स्नॅक्सपेक्षा अधिक हेल्दी.
– मुलांसाठी शाळेत डब्यात किंवा पाहुणचाराला दिल्यास उत्कृष्ट पर्याय.
आजच्या धावपळीच्या काळात झटपट आणि आरोग्यदायी काही बनवणं ही खरी कसरत असते. पण फक्त 10 मिनिटांत तयार होणारे तेलाशिवाय बटाट्याचे चिप्स हा एकदम सोपा, आरोग्यदायी आणि सगळ्यांच्या आवडीचा पर्याय आहे. या दिवाळीत किंवा खास प्रसंगी गोडाबरोबरच असा हेल्दी स्नॅक करून बघा.