रत्नागिरी : येथे बोलताना आमदार भास्कर जाधव यांनी शिवसेना (उद्धव बाळासाहेब ठाकरे) पक्षातील अंतर्गत घडामोडींवर तसेच विरोधकांच्या राजकीय रणनीतीवर परखड भाष्य केले. त्यांनी स्पष्ट शब्दांत सांगितले की, "उद्धव ठाकरे यांना जाणीवपूर्वक त्रास देण्याचा प्रयत्न सुरू आहे". त्यांनी भाजप व विरोधकांवर जोरदार टीका केली आणि पक्षातील काही नेत्यांच्या वर्तनावर प्रश्नचिन्ह उपस्थित केले.
राजन साळवी आणि निष्ठावान बिरुदावलीवर टीका
भास्कर जाधव यांनी माजी आमदार राजन साळवी यांच्या "मी एकमेव निष्ठावान" या वक्तव्यावर टोला लगावत म्हटले की, "स्वतःच स्वतःला एखादी बिरुदावली लावतो, सुरुवातीला लोकांना अप्रूप वाटतं; पण नंतर तीच गोष्ट चेष्टेचा विषय होते." त्यांनी उपस्थितांना विचारले की, "हा निष्ठावान हा किताब तुम्हाला लावावा का? हे राजन साळवींना विचारा."
भाजपमध्ये प्रवेश आणि स्वागताविषयी शंका
भास्कर जाधव यांनी प्रश्न उपस्थित केला की, "राजन साळवी यांचा भाजपमध्ये प्रवेश का झाला नाही? तिथे विरोध कोणी केला?" त्यांनी हे देखील सांगितले की, "सामंत बंधूंनी त्यांचं स्वागत केलं असेल; पण हे स्वागत आहे की कबड्डी कबड्डी करत त्यांना आत घेऊन आपटायची तयारी आहे, हे येत्या काळात स्पष्ट होईल."
'ऑपरेशन टायगर'चे राजकारण
भास्कर जाधव यांनी विरोधकांवर निशाणा साधत म्हटले, "उद्धव ठाकरेंचे लोक फोडणं म्हणजे ऑपरेशन टायगर. विरोधकांना आजही एकच टायगर मान्य आहे, आणि तो म्हणजे उद्धव बाळासाहेब ठाकरे. याचा आम्हाला अभिमान आहे." त्यांनी पुढे सांगितले की, "उद्धव ठाकरे यांना त्रास द्यायचाच हा एक कलमी कार्यक्रम सुरू आहे."
विरोधकांच्या दबावाच्या रणनीतीवर आरोप
भास्कर जाधव यांनी असा आरोप केला की, "काही लोकांना वेगवेगळ्या मार्गाने आपल्याकडे वळविण्याचा प्रयत्न सुरू आहे. त्यासाठी दबाव टाकला जात आहे." त्यांनी स्पष्टपणे सांगितले की, "सध्या केवळ सुडाचं राजकारण सुरू आहे. इतकं होऊनही उद्धव ठाकरे खचले नाहीत, हात टेकले नाहीत."
'अभी भी टायगर जिंदा है!'
भास्कर जाधव म्हणाले, "उद्धव ठाकरे खंबीरपणे उभे आहेत, त्यामुळे विरोधकांची झोप उडाली आहे. त्यांच्या मनात भीती आहे की, 'अभी भी टायगर जिंदा है!'" त्यांनी कार्यकर्त्यांना उद्देशून सांगितले की, "जाणाऱ्यांना जाऊ द्या, असं पक्षप्रमुखांनी म्हटलं असलं तरी, नेत्यांनी ही भाषा वापरू नये. त्यांना पुन्हा पक्षात कसं आणता येईल, यावर विचार करावा."
जितेंद्र आव्हाड आणि संजय राऊत यांना सल्ला
भास्कर जाधव यांनी राष्ट्रवादी शरद पवार पक्षातील नेते जितेंद्र आव्हाड आणि संजय राऊत यांना एकमेकांवर टीका न करता विरोधकांविरोधात लढण्याचा सल्ला दिला. ते म्हणाले, "आपसांत एकमेकांवर बोलण्याची गरज नाही. संघर्ष करायचा असेल, तर तो विरोधकांविरोधात करा."
शिवसेना (उद्धव बाळासाहेब ठाकरे) पक्षातील अंतर्गत वाद आणि विरोधकांची रणनीती या पार्श्वभूमीवर भास्कर जाधव यांनी रत्नागिरीतून जोरदार हल्लाबोल केला. त्यांनी कार्यकर्त्यांना संघटित राहण्याचा आणि विरोधकांच्या दबावाला न झुकण्याचा सल्ला दिला. त्यांच्या या भाषणामुळे महाराष्ट्राच्या राजकीय वर्तुळात पुन्हा एकदा खळबळ माजली आहे.