Maharashtra Private Sector Working Hours: महाराष्ट्रातील खाजगी क्षेत्रात काम करणाऱ्या लाखो कर्मचाऱ्यांसाठी बुधवारी एक मोठा निर्णय घेण्यात आला आहे. राज्य मंत्रिमंडळाने कामगार कायद्यांमध्ये सुधारणा करत दैनंदिन कामाचे तास 9 वरून 10 करण्यास मंजुरी दिली आहे. हा निर्णय गुंतवणूक वाढवणे, रोजगाराच्या संधी निर्माण करणे आणि कामगारांच्या हक्कांचे रक्षण करण्याच्या उद्देशाने घेतल्याचे सरकारचे म्हणणे आहे.
केंद्रीय शिफारशींनुसार बदल
मुख्यमंत्री देवेंद्र फडणवीस यांच्या अध्यक्षतेखाली झालेल्या मंत्रिमंडळ बैठकीत केंद्रीय टास्क फोर्सच्या शिफारशी मान्य करण्यात आल्या. यामुळे महाराष्ट्र आता कर्नाटक, तामिळनाडू, तेलंगणा, उत्तर प्रदेश आणि त्रिपुरा यांसारख्या राज्यांच्या यादीत सामील झाला आहे, जिथे आधीच असे बदल लागू आहेत.
हेही वाचा - Devendra Fadanvis: 'हा सरसकट जीआर नाही...', भुजबळांच्या नाराजीवर काय म्हणाले फडणवीस?
नवीन नियम काय सांगतात?
सरकारी निवेदनानुसार, उद्योगांना आता जास्त मागणी असलेल्या काळात किंवा कामगार टंचाईच्या वेळी अखंडपणे काम करण्याची संधी मिळेल. कामाचे तास 9 वरून 12 पर्यंत वाढवले जाऊ शकतात, मात्र प्रत्येक 6 तासांनंतर विश्रांती देणे बंधनकारक असेल. त्याचबरोबर, कर्मचाऱ्यांना योग्य ओव्हरटाइमचे पैसे दिले जाणार आहेत.
हेही वाचा - Namo Shetkari 7th Installment : नमो शेतकरी महासन्मान निधीबाबत मोठी माहिती समोर, 7 वा हप्ता कधी येणार?
कायदा कोणावर लागू होणार?
ही सुधारणा महाराष्ट्र दुकाने आणि आस्थापना (रोजगार आणि सेवा अटींचे नियमन) कायदा, 2017 मध्ये करण्यात आली आहे. त्यामुळे दुकाने, हॉटेल्स, मनोरंजन स्थळे आणि इतर व्यवसायांमध्ये काम करणाऱ्या कर्मचाऱ्यांवर या नियमांचा परिणाम होईल. सरकारचे म्हणणे आहे की, या बदलामुळे कामगारांना अधिक लवचिकता मिळेल आणि उत्पादकता वाढेल.
सरकारचा युक्तिवाद
सरकारच्या मते, वाढलेले तास औद्योगिक उत्पादनात लवचिकता देतील आणि महाराष्ट्र गुंतवणुकीसाठी अधिक आकर्षक राज्य बनेल. ओव्हरटाइमच्या माध्यमातून कर्मचाऱ्यांना अतिरिक्त उत्पन्नाची संधीही मिळेल.
कामगार संघटनांची भूमिका काय असेल?
या निर्णयावर कामगार संघटना आणि कर्मचारी संघटनांचा प्रतिसाद अद्याप समोर आलेला नाही. काही तज्ञांचा अंदाज आहे की कामाचे तास वाढल्यामुळे कर्मचाऱ्यांवर मानसिक व शारीरिक ताण वाढू शकतो, पण ओव्हरटाइम आणि विश्रांतीच्या तरतुदींमुळे त्याचा तोल साधला जाऊ शकतो.