Sanjay Raut: शिवसेना (उद्धव बाळासाहेब ठाकरे) पक्षाचे खासदार संजय राऊत हे त्यांच्याच शैलीतील स्पष्ट वक्तेपणासाठी प्रसिद्ध आहेत. राजकीय वर्तुळात नेहमीच परखड मत मांडणारे राऊत यांनी पुन्हा एकदा चर्चेचा विषय ठरलेले विधान केले आहे. विधिमंडळाच्या फोटोसेशनवेळी उद्धव ठाकरे आणि मुख्यमंत्री एकनाथ शिंदे समोरासमोर आले असताना, उद्धव ठाकरे यांनी शिंदेंकडे दुर्लक्ष केल्यावर संजय राऊत यांनी या विषयावर भाष्य करत टोला लगावला आहे.
हेही वाचा: नापिकी व कर्जबाजारीपणाला कंटाळून अल्पभूधारक शेतकऱ्याची गळफास घेऊन आत्महत्या
विधिमंडळात एकनाथ शिंदे आणि उद्धव ठाकरे आमने-सामने
विधानभवनात आयोजित करण्यात आलेल्या फोटोसेशनमध्ये उद्धव ठाकरे आणि मुख्यमंत्री एकनाथ शिंदे आमनेसामने आले. मात्र, ठाकरे यांनी शिंदेंकडे पाहूनही त्यांना नजरअंदाज केल्याचे चित्र पाहायला मिळाले. यावर प्रतिक्रिया देताना संजय राऊत म्हणाले, 'उद्धव ठाकरे हे स्वाभिमानी नेते आहेत. ज्या व्यक्तीने शिवसेनेच्या पाठीत खंजीर खुपसला, डुप्लिकेट शिवसेना स्थापन केली, अशा व्यक्तीसोबत हस्तांदोलन करणे महाराष्ट्रालाही पसंत पडले नसते. त्यांनी काय शिंदेंना मांडीवर घेऊन बसायला हवे होते का?' अशा शब्दांत राऊत यांनी आपली भूमिका स्पष्ट केली. शिवसेना गद्दारांबाबत त्यांची भूमिका कायमच ठाम असल्याचे यावरून दिसून आले.
हेही वाचा: संवर्धनाऐवजी नियंत्रण? वाघांच्या वाढीवर बंदी; नेमका प्रकार काय जाणून घ्या
उद्धव ठाकरेंचा दिल्ली दौरा
यावेळी राऊत यांनी उद्धव ठाकरे यांच्या संभाव्य दिल्ली दौऱ्याबाबतही भाष्य केले. इंडिया ब्लॉकची बैठक घेण्याची मागणी उद्धव ठाकरे यांनी वारंवार केली आहे. यासंदर्भात काँग्रेसचे सरचिटणीस के. सी. वेणुगोपाल यांच्यासोबत कालच चर्चा झाली असून, इंडिया ब्लॉकमधील अस्वस्थ नेत्यांची बैठक घेऊन राष्ट्रीय राजकारणासंदर्भात दिशा ठरवण्याचा विचार आहे. 19 जुलै ही संभाव्य तारीख असून अंतिम निर्णय लवकर घेतला जाईल. स्थानिक स्वराज्य संस्था किंवा विधानसभेच्या राजकारणावर इंडिया ब्लॉकमध्ये चर्चा करण्याचे कारण नसल्याचेही त्यांनी स्पष्ट केले. इंडिया ब्लॉक हे राष्ट्रीय मुद्द्यांसाठी बनवलेले व्यासपीठ असल्याचेही राऊत यांनी सांगितले.
दिल्ली दौऱ्याच्या तयारीसाठी महाविकास आघाडीतील नेत्यांमध्ये चर्चा सुरू आहे. इंडिया ब्लॉकच्या बैठकीत लोकसभा निवडणुकीनंतरची पहिली बैठक होणार असल्याने अनेक सदस्य अस्वस्थ आहेत. राष्ट्रीय प्रश्नांवर चर्चा करण्यासाठी ही बैठक गरजेची असल्याचे राऊत म्हणाले. विधानसभेच्या राजकारणावर चर्चा करण्यासाठी महाविकास आघाडी आहे आणि त्या पातळीवर चर्चा सुरू राहील. इंडिया ब्लॉकमधून राष्ट्रीय राजकारणासाठी दिशा ठरवली जाईल आणि उद्धव ठाकरे यांच्या दिल्ली दौऱ्याबाबत लवकरच अधिकृत घोषणा केली जाईल, असेही राऊत यांनी स्पष्ट केले.