ChatGPT Privacy Risks: आजच्या डिजिटल युगात कृत्रिम बुद्धिमत्ता (Artificial Intelligence) मानवी जीवनाचा अविभाज्य भाग बनली आहे. अभ्यास, नोकरी, लेखन, माहिती शोधणे अशा असंख्य गोष्टींसाठी लोक AI टूल्सचा वापर करत आहेत. त्यापैकी सर्वाधिक लोकप्रिय साधन म्हणजे ChatGPT. हे टूल खरोखरच उपयुक्त आहे, पण याचा वापर करताना काही गंभीर बाबींकडे दुर्लक्ष केल्यास मोठी अडचण निर्माण होऊ शकते. चला जाणून घेऊया, ChatGPT वापरताना कोणत्या पाच गोष्टी कधीच शेअर करू नयेत.
1. वैयक्तिक माहिती कधीच शेअर करू नका
ChatGPT वर कधीही आपलं पूर्ण नाव, घराचा पत्ता, जन्मतारीख, फोन नंबर किंवा ईमेल आयडी शेअर करू नका. ही माहिती चुकीच्या लोकांच्या हाती गेल्यास तुमच्यावर फसवणूक, स्पॅमिंग किंवा ओळख चोरीसारखे धोके निर्माण होऊ शकतात.
2. बँक किंवा आर्थिक माहिती देणं टाळा
क्रेडिट कार्ड क्रमांक, बँक खाते तपशील, UPI आयडी, पासवर्ड अशा गोष्टी ChatGPT वर कधीही लिहू नका. हे तपशील गुप्त ठेवणं अत्यंत महत्त्वाचं आहे. एकदा ही माहिती लीक झाली तर आर्थिक नुकसान होण्याची शक्यता खूप जास्त असते.
हेही वाचा: Food In Space : तुम्ही पाणी, कॉफी खाऊ शकता! शुभांशू शुक्लांनी शेअर केला अंतराळातला मजेदार व्हिडिओ
3. सरकारी दस्तऐवजांची माहिती सुरक्षित ठेवा
आधार क्रमांक, पॅन कार्ड क्रमांक, पासपोर्ट डिटेल्स किंवा इतर कोणतेही सरकारी कागदपत्रांशी संबंधित माहिती AI टूल्सवर शेअर करू नका. हे दस्तऐवज तुमच्या वैयक्तिक सुरक्षेशी थेट जोडलेले असतात. जर ते बाहेर गेले तर गैरवापर होऊ शकतो.
4. ऑफिसमधील गोपनीय कागदपत्रं शेअर करू नका
अनेक जण कामाशी संबंधित माहिती लिहिण्यासाठी किंवा डॉक्युमेंट तयार करण्यासाठी ChatGPT वापरतात. पण इथे मोठा धोका लपलेला असतो. ऑफिसमधील प्रोजेक्ट रिपोर्ट्स, कायदेशीर कागदपत्रं किंवा इतर गोपनीय माहिती अशा प्लॅटफॉर्मवर देणं धोकादायक आहे. यामुळे कंपनीची गुपितं बाहेर जाण्याची शक्यता असते.
5. आरोग्य व लोकेशन डिटेल्स देणं टाळा
आपली वैद्यकीय माहिती, रिपोर्ट्स किंवा वैयक्तिक आरोग्य समस्या ChatGPT वर सांगणं योग्य नाही. कारण ChatGPT डॉक्टर नाही आणि चुकीची सल्लामसलत तुमच्यासाठी घातक ठरू शकते. त्याचप्रमाणे, आपण कुठे आहात, कुठे प्रवास करणार आहात ही माहितीही देऊ नका. ही माहिती गैरव्यक्तींना मिळाल्यास तुमच्या सुरक्षेवर थेट परिणाम होऊ शकतो.
ChatGPT हे एक आधुनिक आणि उपयुक्त साधन आहे, पण त्याचा वापर करताना सावधगिरी बाळगणं तितकंच महत्त्वाचं आहे. लक्षात ठेवा, इंटरनेटवर शेअर केलेली प्रत्येक गोष्ट कुठेतरी नोंदवली जाते. त्यामुळे स्वतःच्या सुरक्षेसाठी आणि डेटा प्रायव्हसीसाठी नेहमी विचारपूर्वकच याचा वापर करा.