मुंबई: राज्यातील सत्तासंघर्ष पुन्हा एकदा रंगत आला असून, भाजप आणि शिंदे गटातील संबंधांमध्ये वाढती अस्वस्थता स्पष्ट दिसू लागली आहे. भाजपच्या वरिष्ठ नेतृत्वाने दिल्लीतून थेट संदेश पाठवून मुख्यमंत्री एकनाथ शिंदेंना ‘सांभाळण्याचा’ सल्ला दिल्याची माहिती मिळते. त्यामुळेच शिंदेसेना आणि भाजप युतीचे समीकरण सध्या राजकीय वर्तुळात चर्चेचा विषय ठरले आहे.
मुख्यमंत्री शिंदे आणि उद्धव ठाकरे यांच्या वाढत्या भेटीगाठी, तसेच शिंदे गटातील मंत्र्यांवर वादग्रस्त प्रकरणांचे सावट, यामुळेच भाजप सावध झाला आहे. विशेषत: स्थानिक स्वराज्य संस्था निवडणुकांमध्ये भाजपने स्वबळाचा नारा दिल्यानंतर, महायुतीतील तणाव अधिकच वाढला आहे.
मुंबई महापालिकेच्या निवडणुकीच्या पार्श्वभूमीवर भाजपने आपली भूमिका बदलण्याचा इशारा दिला आहे. मुख्यमंत्री शिंदे यांनी भाजपशी चर्चा करून मुंबईत युती करूनच निवडणूक लढण्याची भूमिका घेतली आहे, पण इतर ठिकाणी मात्र निर्णय नंतर घेतला जाईल, असे सांगितले आहे.
भाजपला सर्वाधिक भीती आहे ती म्हणजे उद्धव ठाकरे आणि राज ठाकरे यांच्या संभाव्य युतीची. जर मराठी मतदारांची एकजूट झाली, तर भाजप आणि शिंदे गटाला मोठा फटका बसू शकतो. याच कारणामुळे मुंबईत भाजप आणि शिंदेसेना युती करून एकत्र लढण्याचा भाजपचा दबाव असल्याचे दिसते.
भाजपला मुंबईत स्वबळावर सर्वाधिक जागा लढण्याची इच्छा आहे. शिंदे गटाच्या तुलनेत भाजप मजबूत असल्याने, भाजप 120 ते 140 जागा लढवण्याच्या तयारीत आहे. मात्र, दुसरीकडे एकनाथ शिंदे यांनीही आपली राजकीय चाळणी सुरू केली आहे.
शिंदे गटाने अलीकडेच आनंदराज आंबेडकर यांच्या रिपब्लिकन सेनेशी युती करत दलित मतदारांवर लक्ष केंद्रित केलं आहे. ही युती म्हणजे शिंदेंची स्वतंत्र ताकद वाढवण्याची तयारी मानली जात आहे. रामदास आठवले यांची रिपाई महायुतीत असतानाही शिंदेंनी हा वेगळा डाव टाकल्याने, भाजपने याकडे गांभीर्याने पाहिलं आहे.
राज्यात सध्या एकनाथ शिंदे यांचा राजकीय खेळ अधिक चतुर झाल्याचं चित्र आहे. भाजपसोबत राहण्याचा किंवा वेगळं होण्याचा अंतिम निर्णय शिंदेंनी आपल्या हातात ठेवला आहे. त्यामुळेच भाजपनेही शिंदेंना नाराज न करण्यासाठी दिल्लीतून 'सांभाळा' असा आदेश पाठवला आहे, हे स्पष्ट दिसते.
मुंबई महापालिका निवडणुकीसाठी राजकीय आकडेमोडी सुरू असतानाच, शिंदे आणि भाजपमधील संबंधांचे भवितव्य कसे ठरेल, याकडे सगळ्यांचे लक्ष लागले आहे.