मुंबई : मारकडवाडीला शरद पवारांनी भेट दिल्यानंतर आता तिथलं वातावरण चांगलंच तापलं आहे. मारकडवाडीच्या जनतेच्या प्रश्नांची उत्तर मिळच नाही तोपर्यंत संघर्ष करत राहणार असल्याचे शरद पवार यांनी स्पष्ट केले. त्यानंतर भाजपा आमदार चंद्रशेखर बावनकुळे यांची एक्स पोस्ट चर्चेत आहे. या पोस्टमध्ये त्यांनी मारकडवाडी येथील ग्रामस्थांनी कायम वेगवेगळ्या पक्षांना साथ दिली असल्याचे त्यांनी म्हटले आहे. तुमच्या माहितीसाठी 2014, 2019 आणि 2024 ची मतांची आकडेवारी देत आहे जरा डोळेउघडून नीट वाचा असे म्हणत बावनकुळेंनी शरद पवारांची कानउघडणी केली आहे.
काय म्हणाले भाजपा प्रदेशाध्यक्ष तथा आमदार चंद्रशेखर बावनकुळे ?
शरद पवार साहेब मारकडवाडी येथील ग्रामस्थांनी कायम वेगवेगळ्या पक्षांना साथ दिली. तुमच्या माहितीसाठी 2014, 2019 आणि 2024 ची मतांची आकडेवारी देत आहे जरा डोळेउघडून नीट वाचा.
2014 मध्ये लोकसभा निवडणुकीत राष्ट्रवादी काँग्रेसकडून लढलेल्या विजयसिंह मोहिते पाटील यांना 533 मतं मिळाली तर महायुतीतील घटकपक्ष असलेल्या सदाभाऊ खोत यांना 664 मतं मिळाली होती. त्याच वर्षी झालेल्या विधानसभा निवडणुकीत राष्ट्रवादीच्या हनुमंत डोळस यांना 294 मते मिळाली तर अपक्ष अनंत खंडागळे यांना 979 मते मिळाली.
2019 मध्ये लोकसभा निवडणुकीत भाजपच्या रणजितसिंह निंबाळकर यांना 956 मतं मिळाली तर राष्ट्रवादीच्या संजय शिंदे यांना 395 मतं मिळाली. मात्र त्याच वर्षी झालेल्या विधानसभा निवडणुकीत मात्र राष्ट्रवादीकडून लढलेल्या उत्तमराव जानकर यांना 1346 मतं मिळाली तर भाजपाकडून लढलेल्या राम सातपुते यांना 300 मतं मिळाली.
2024 मध्ये लोकसभा निवडणुकीत राष्ट्रवादी शरद पवार गटाच्या धैर्यशील मोहिते पाटील यांना 1021 मतं तर भाजपाच्या रणजितसिंह निंबाळकर यांना 466 मतं मिळाली विधानसभा निवडणुकीत मात्र राष्ट्रवादी शरद पवार गटाच्या उत्तमराव जानकर यांना 843 मतं तर भाजपच्या राम सातपुते यांना 1003 मतं मिळाली.
या आकडेवारीवरून स्पष्ट होत की, मारकडवाडी ग्रामस्थांनी कधी राष्ट्रवादीला साथ दिली, कधी अपक्ष तर कधी भाजपाला साथ दिली. त्यामुळे हे गाव कुणा एकाची मक्तेदारी नाही. यावेळी लोकांनी आणि लाडक्या बहिणींनी तुम्हाला नाकारलं. त्यामुळे उगाच भ्रम पसरवून ईव्हीएमवर खापर फोडू नका. जरा मारकवाडी येथे झालेल्या मतांची आकडेवारी डोळे उघडून वाचा म्हणजे तुमचं डोकं ठिकाणावर येईल.
या एक्स पोस्टच्या माध्यमातून बावनकुळेंनी पवारांना आकडेवारीच्या माध्यमातून मारकडवाडी गावाने कुणा एका पक्षाची साथ न देता तटस्थ मतदान केल्याचे सांगितले.