मुंबई: स्टेट बँक ऑफ इंडियाच्या (एसबीआय) 2,929 कोटी रुपयांच्या फसवणुकीच्या प्रकरणी रिलायन्स कम्युनिकेशन लिमिटेडचे संचालक अनिल अंबानी यांच्यावर केंद्रीय अन्वेषण विभागाने (CBI) गुन्हा नोंदवला आहे. यानंतर, 23 ऑगस्ट रोजी सीबीआयच्या पथकांनी अंबानी यांच्यावरील कफ परेड येथील निवासस्थान आणि रिलायन्स कम्युनिकेशन कंपनीच्या कार्यालयावर छापे टाकून तपासणी केली. सूत्रांच्या माहितीनुसार, छापेमारीदरम्यान अनेक महत्वाचे दस्तऐवज आणि कागदपत्रे जप्त करण्यात आली आहेत.
एसबीआयच्या तक्रारीवरून रिलायन्स कम्युनिकेशन आणि अनिल अंबानी यांच्यासह काही अज्ञात शासकीय अधिकारी आणि खासगी व्यक्तींविरोधात गुन्हा दाखल करण्यात आला आहे. या प्रकरणात बँकेची फसवणूक, विश्वासघात आणि इतर गुन्हेगारी कलमांचा समावेश आहे.
हेही वाचा: Air Defence Weapon System: आता शत्रूलाही धडकी भरणार! एकात्मिक हवाई संरक्षण शस्त्र प्रणालीची पहिली चाचणी यशस्वी
ही फसवणूक प्रकरणाची मुळे काही वर्षांपूर्वीची आहेत. नोव्हेंबर 2020 मध्ये एसबीआयने रिलायन्स कम्युनिकेशनचे कर्ज खाते आणि प्रवर्तक अनिल अंबानी यांना काळ्या यादीत टाकले होते. जानेवारी 2021 मध्ये या गैरव्यवहारांबाबत सीबीआयकडे तक्रारही करण्यात आली होती. मात्र, दिल्ली उच्च न्यायालय आणि सर्वोच्च न्यायालयाच्या निकालांनंतर बँकेने ही कारवाई मागे घेऊन रिलायन्स कम्युनिकेशन आणि अंबानी यांचे नाव काळ्या यादीतून हटवले होते.
तथापि, रिझर्व्ह बँकेच्या नव्या नियमांनुसार, मागील वर्षी बँकेने पुन्हा कारवाई करत सीबीआयकडे याबाबतची तक्रार दाखल केली. त्यानुसार, सीबीआयने अनिल अंबानी यांच्या कफ परेड येथील निवासस्थानावर आणि रिलायन्स कम्युनिकेशनच्या कार्यालयावर छापेमारी केली.
एसबीआयच्या तक्रारीत असे म्हटले आहे की, रिलायन्स कम्युनिकेशनने बँकेकडून घेतलेले कर्ज अपेक्षित उद्देशासाठी वापरलेले नाही. कर्जाची रक्कम विविध व्यवहारांद्वारे समूहातील इतर कंपन्यांकडे वळवण्यात आली होती. कंपनीने बोगस देणेकरी तयार करून कर्जाचे गैरवापर केले. तसेच, कर्ज बुडवले जात असताना, रिलायन्स इन्फ्राटेल आणि नेटिझन इंजिनीअरिंग या अंबानी समूहातील कंपन्यांना लाभ देण्यासाठी भांडवली रक्कम माफ करण्यासारखे व्यवहार केले गेले.
हेही वाचा: Masood Azhar : पाकिस्तानचे शेपूट वाकडेच! जैश-ए-मोहम्मदची नवी मोर्चेबांधणी सुरू: 313 नवीन दहशतवादी अड्डे बांधण्याचा कट
या छापेमारीत सीबीआयने अनेक आर्थिक दस्तऐवज आणि व्यवहारांची नोंद जप्त केली आहे. तपास अजून सुरू आहे आणि पुढील तपासामुळे प्रकरणातील अन्य तपशील उघडकीस येण्याची शक्यता आहे.
अनिल अंबानी आणि रिलायन्स कम्युनिकेशनवर ही कारवाई ही मोठ्या प्रमाणावर आर्थिक फसवणुकीच्या प्रकरणातील एक महत्त्वाचा टप्पा मानला जात आहे. या प्रकरणाचा परिणाम भारतीय आर्थिक बाजारपेठेवर आणि मोठ्या कॉर्पोरेट गटांवरील विश्वासावरही होऊ शकतो.
सध्या, सीबीआय या प्रकरणाचा सखोल तपास करत असून, आवश्यक असल्यास पुढील कारवाई तसेच अधिक व्यक्तींना समाविष्ट करण्याची शक्यता वर्तवली जात आहे. त्यामुळे पुढील काही आठवड्यांत या प्रकरणासंदर्भातील अधिक माहिती समोर येण्याची अपेक्षा आहे.