Mira-Bhayandar Tragedy: काशिमीरा परिसरात बेकायदेशीरपणे चालवल्या जाणाऱ्या आरएमसी (रेडी मिक्स काँक्रीट) प्लांटविरुद्ध स्थानिक नागरिकांचा रोष सतत वाढत आहे. गुरुवारी सिमेंट-काँक्रीटच्या ट्रकने धडक दिल्याने एका 12 वर्षीय मुलाचा रुग्णालयात उपचारादरम्यान मृत्यू झाला. या अपघातामुळे संपूर्ण परिसरात शोक आणि संतापाचे वातावरण निर्माण झाले. दरम्यान, काशिमीरा पोलिसांनी डंपर चालकाला अटक केली आहे.
मृत मुलाचे नाव सनी रमेश राठोड (12) असून तो मीनाक्षी नगर झोपडपट्टीत राहत होता. तो काशिगाव येथील महापालिकेच्या शाळेतून घरी परतत असताना हा अपघात झाला. नीलकमल नाक्याजवळ रस्ता ओलांडताना डंपरने त्याला धडक दिली. सनी रस्त्यावर खाली पडला आणि त्याच्या शरीराच्या खालच्या भागात गंभीर दुखापत झाली.
हेही वाचा - AI Solved Crime Case : सख्खा मित्र बनला पक्का वैरी! पण का? AI ने शोधला आरोपी; स्टील कॅपने उलगडलं भयानक रहस्य
त्याला तात्काळ जवळच्या खासगी रुग्णालयात दाखल करण्यात आले. सुरुवातीला त्याची प्रकृती सुधारल्याचे दिसत होते, परंतु उपचारादरम्यान त्याने प्राण सोडले. याप्रकरणी काशिमिरा पोलीस ठाण्यात अपघाताची नोंद झाली असून, पोलीस निरीक्षक राजेंद्र कांबळे यांनी डंपर चालकाला अटक केल्याची माहिती दिली.
हेही वाचा - Sanjay Raut Vs CM Fadnavis : आरक्षणावरून फडणवीसांना घेरलं, राऊतांनी मोदींनाही डिवचलं
दरम्यान, मुंबईतील घाटकोपरमध्ये शनिवारी पहाटे आणखी एक गंभीर अपघात झाला. एलबीएस रोडवर एका भरधाव कारने नियंत्रण गमावले आणि दुभाजकाला धडकून थेट रस्त्याच्या कडेला असलेल्या दुकानांवर आदळली. या वेगवान कारने फुटपाथजवळ झोपलेल्या तीन जणांना धडक दिली.
प्राप्त माहितीनुसार, या अपघातात तीनही जण गंभीर जखमी झाले. स्थानिकांनी आणि अधिकाऱ्यांनी त्यांना तत्काळ राजावाडी रुग्णालयात हलवले. डॉक्टरांनी सांगितले की तिन्ही जखमींची प्रकृती गंभीर असून त्यांच्यावर अतिदक्षता विभागात उपचार सुरू आहेत.