Unique Temples: हिंदू धर्मात देवपूजेच्या वेळी साध्या, सात्त्विक अन्नाचा नैवेद्य दाखवला जातो असा सर्वसामान्य समज आहे. मात्र भारतात काही अशीही मंदिरे आहेत जिथे परंपरेनुसार देवतेला नैवेद्य म्हणून मांस, मासे आणि मद्य अर्पण केले जाते. आणि आश्चर्याची गोष्ट म्हणजे, या नैवेद्याचा प्रसाद भक्तांना वितरित देखील केला जातो. धार्मिक परंपरा, श्रद्धा आणि स्थानिक लोकसंस्कृती यांच्या मिश्रणातून या अनोख्या परंपरा जन्माला आल्या आहेत.
चला, जाणून घेऊया अशाच 5 प्रसिद्ध मंदिरांबद्दल जिथे मांसाहारी नैवेद्य आणि मद्याचा प्रसाद दिला जातो:
1) कामाख्या मंदिर, असम
असमच्या नीलांचल पर्वतरांगांवर वसलेले कामाख्या देवीचे मंदिर भारतातील 51 शक्तिपीठांपैकी एक मानले जाते. या मंदिरात देवीला मांस, मासे आणि मद्याचा नैवेद्य दाखवण्याची परंपरा आहे. विशेष म्हणजे, या नैवेद्याचा काही भाग प्रसाद म्हणून भक्तांमध्ये वाटला जातो. तंत्र साधनेचे केंद्र मानले जाणारे हे मंदिर भाविकांच्या श्रद्धेचे स्थान आहे.
2) तारापीठ, पश्चिम बंगाल
पश्चिम बंगालच्या बीरभूम जिल्ह्यातील तारापीठ मंदिर दुर्गा भक्तांमध्ये विशेष प्रसिद्ध आहे. येथे देवीला बकऱ्याची बलि आणि मद्य अर्पण केले जाते. या बलिदानाचा भाग नंतर प्रसाद म्हणून भक्तांमध्ये वाटला जातो. स्थानिक लोकांच्या श्रद्धेनुसार, असे केल्याने देवी प्रसन्न होते अशी धारणा आहे.
हेही वाचा: SHRAVAN 2025: श्रावणात ‘ही’ फुले चुकूनही महादेवाला अर्पण करू नका, अन्यथा होईल प्रकोप
3) काल भैरव मंदिर, मध्य प्रदेश व गुजरात
काल भैरव हे तामसिक शक्तीचे रूप मानले जाते. मध्य प्रदेशातील उज्जैन आणि गुजरातमधील काही काल भैरव मंदिरांत भगवान भैरवाला मद्य अर्पण करण्याची परंपरा आहे. या मंदिरात मद्य नैवेद्य दाखवल्यानंतर त्याचा प्रसाद भक्तांना दिला जातो. विशेषतः उज्जैनच्या काल भैरव मंदिरातील ही परंपरा हजारो भाविकांना आकर्षित करते.
4) कालीघाट मंदिर, कोलकाता
कोलकात्यातील कालीघाट मंदिर हे शक्तिपीठांपैकी एक आहे. येथे देवी कालीला बकऱ्याची बलि दिली जाते आणि त्यानंतर तो प्रसाद म्हणून भक्तांना दिला जातो. सुमारे 200 वर्षांची परंपरा असलेले हे मंदिर बंगालमधील श्रद्धेचे मोठे केंद्र आहे.
5) मुनियांदी स्वामी मंदिर, तमिळनाडू
तमिळनाडूच्या मदुराईजवळ असलेल्या मुनियांदी स्वामी मंदिरात चिकन व मटन बिर्याणी नैवेद्य म्हणून दाखवली जाते. भगवान मुनियांदी हे शिवाचे रूप मानले जाते आणि त्यांना अशा प्रकारच्या नैवेद्याचा नैवेद्य दाखवून प्रसाद म्हणून भक्तांमध्ये वाटले जाते.
या मंदिरांच्या परंपरा धार्मिक श्रद्धेचा भाग असून, स्थानिक लोकसंस्कृती आणि देवभक्ती यांचं अनोखं मिश्रण दर्शवतात. अशा मंदिरांना भेट देणं म्हणजे श्रद्धा आणि परंपरेच्या अनोख्या विश्वात डोकावण्यासारखं आहे