मॉस्को : रशियाचे म्हणणे आहे की, पाश्चात्य देश युक्रेनमध्ये युद्धबंदीच्या मार्गात अडथळा बनत आहेत. रशियाचे परराष्ट्र मंत्री सर्गेई लावरोव्ह यांनी पाश्चात्य देश जाणूनबुजून युक्रेन शांतता चर्चेत व्यत्यय आणत असल्याचा आरोप केला आहे. अमेरिकेचे अध्यक्ष डोनाल्ड ट्रम्प युक्रेनचे अध्यक्ष वोलोदिमिर झेलेन्स्की आणि रशियाचे अध्यक्ष व्लादिमीर पुतिन यांच्यात द्विपक्षीय बैठकीसाठी आग्रह धरत असताना लावरोव्ह यांनी हा दावा केला आहे. डोनाल्ड ट्रम्प यांनी अलीकडेच पुतिन आणि झेलेन्स्की यांची स्वतंत्रपणे भेट घेतली आहे.
रशियाचे परराष्ट्र मंत्री सर्गेई लावरोव्ह यांना रविवारी युक्रेनमधील युद्धबंदीच्या प्रगतीबद्दल सरकारी टीव्ही स्टेशन रोसियावर प्रश्न विचारण्यात आला. यावर त्यांनी म्हटले की, पाश्चात्य देश युक्रेन शांतता चर्चा थांबवण्यासाठी सबबी शोधत आहेत. तसेच, लाव्हरोव्ह यांनी युक्रेनचे राष्ट्राध्यक्ष वोलोदिमिर झेलेन्स्की यांना हट्टी वृत्ती स्वीकारल्याबद्दल आणि त्यांच्या अटींवर टिकून राहिल्याबद्दल लक्ष्य केले आहे. हे युक्रेनमधील शांतता चर्चेत अडथळा आणण्याचे संकेत देखील देते, असे ते म्हणाले.
हेही वाचा - Masood Azhar : पाकिस्तानचे शेपूट वाकडेच! जैश-ए-मोहम्मदची नवी मोर्चेबांधणी सुरू: 313 नवीन दहशतवादी अड्डे बांधण्याचा कट
युक्रेनियन अधिकारी अडथळे निर्माण करत आहेत
लाव्ह्रोव्ह म्हणाले की, केवळ पाश्चिमात्य देशच नाही तर, युक्रेनियन अधिकारीही पुतिन आणि ट्रम्प यांनी ठरवलेल्या प्रक्रियेत व्यत्यय आणण्याचा प्रयत्न करत आहेत. ते म्हणाले की, पुतिन आणि ट्रम्प यांच्यातील भेटीचे खूप चांगले परिणाम मिळाले आहेत. तथापि, आम्हाला वाटते की, या प्रयत्नांना हाणून पाडण्यासाठी काम केले जात आहे. पश्चिमेपासून युक्रेनपर्यंत सर्वजण यात सहभागी आहेत. या आठवड्याच्या सुरुवातीला, झेलेन्स्की म्हणाले होते की, त्यांना पुतिनला भेटायचे आहे. परंतु, रशिया ते टाळण्याचा प्रयत्न करत आहे. यावर, लावरोव्ह म्हणाले की, झेलेन्स्की आणि पुतिन यांच्यात बैठकीची कोणतीही योजना नाही. त्यांनी सांगितले की, अशा बैठकीसाठी काही गोष्टी सोडवाव्या लागतील. विशेषतः युक्रेनमध्ये युरोपियन सैन्याची उपस्थिती अस्वीकार्य आहे.
2022 पासून युद्ध सुरू आहे
फेब्रुवारी 2022 पासून रशिया आणि युक्रेनमध्ये लढाई सुरू आहे. अलीकडच्या काही महिन्यांत, अमेरिकेचे अध्यक्ष डोनाल्ड ट्रम्प यांनी ही लढाई थांबवण्यासाठी प्रयत्न केले आहेत, असे दावे केले जात आहेत. तथापि, सर्व दाव्यांनंतरही, युद्धबंदीबाबत कोणताही ठोस निकाल लागलेला नाही. रशिया आता युक्रेन आणि युरोपवर आरोप करत आहे. तर, युक्रेन रशियावर युद्ध भडकवण्याचा आरोप करत आहे.
हेही वाचा - 'ट्रम्प सकाळी मोदींशी हात मिळवतात, मग रात्री पाठीत सुरा खुपसतात..', Trump Tariff वरून अमेरिकन अर्थशास्त्रज्ञाची जोरदार टीका