पुणे : पुणेकरांसाठी मोठी आणि आनंदाची बातमी समोर आली आहे. पुणे महापालिकेकडून महामेट्रोला 14 कोटी रुपये देण्याची मान्यता मिळाली आहे. स्थायी समितीच्या बैठकीत ही मान्यता देण्यात आली आहे. महामेट्रोने कर्वे रस्त्यावर मेट्रोचे काम करताना नळस्टॉप चौकात उड्डाणपूल बांधला आहे. या कामासाठी पूर्वगणनपत्रकात निश्चित केलेल्या रकमेपेक्षा जास्त खर्च झाला असल्याचा दावा महामेट्रोने केला होता. यानंतर महापालिकेकडे वाढीव खर्चाच्या 14 कोटी रुपयांची मागणी करण्यात आली होती. यानंतर आता पुणे महापालिकेकडून महामेट्रोला 14 कोटी रुपये देण्याच्या मागणीस मान्यता देण्यात आली आहे.
काय आहे महामेट्रो प्रकल्प?
वनाज कॉर्नर ते रामवाडी मेट्रोचे काम करताना कर्वे रस्त्यावरील वाहतूक कोंडी सोडविण्यासाठी नळ स्टॉप चौकात उड्डाणपूल बांधण्याचा निर्णय घेण्यात आला. हा उड्डाणपूल महामेट्रोकडून बांधून घेण्यास 2020 मध्ये महापालिकेच्या स्थायी समितीने मान्यता दिली. त्यावेळी 39 कोटींच्या खर्चास मान्यता दिली होती.
पण हे काम पूर्ण झाल्यानंतर महामेट्रोने या उड्डाणपुलासाठी एकूण 58 कोटी रुपये खर्च झाला आहे. त्यामुळे वाढीव खर्चासाठी 19 कोटी रुपये द्यावेत अशी मागणी केली होती. महापालिकेने या कामाची तसेच खर्चाची तपासणी करून त्याचा अहवाल सादर करण्यासाठी सीओईपीला सल्लागार म्हणून नियुक्त केले. दरम्यान आता पुणे महापालिकेकडून महामेट्रोला 14 कोटी रुपये देण्याची मान्यता मिळाली असल्याने पुणेकरांमध्ये आनंदाचे वातावरण पाहायला मिळत आहे.