पुणे: राज्यातील स्थानिक स्वराज्य संस्थांच्या निवडणुका अनेक दिवसांपासून रखडल्या आहेत. निवडणूक आयोगाने या निवडणुका दिवाळीनंतर असल्याचे जाहीर केले असून आता पुणे महापालिकेने येत्या निवडणुकीसाठी प्रभाग प्रारुप रचना जाहीर केली आहे. यामध्ये एकूण 41 प्रभाग असून त्यात 165 नगरसेवक असणार आहेत.
पुणे महानगरपालिकेकडून प्रभाग रचना जाहीर
पुणे महानगरपालिकेने निवडणुकीसाठी प्रारुप प्रभाग रचना जाहीर केली आहे. दिवाळीनंतर राज्यात स्थानिक स्वराज्य संस्थांच्या निवडणुका होणार आहेत. याच पार्श्वभूमीवर पुणे महानगरपालिकेने प्रभाग रचना जाहीर केली आहेत. यात 41 प्रभाग असणार आहेत. यातील 40 प्रभाग चार सदस्यीय तर एक पाच सदस्यीय असणार आहे. यातून एकूण 165 नगरसेवक निवडले जाणार आहेत.
हेही वाचा: Ganeshotsav 2025: गणेशोत्सवादरम्यान पुणे मेट्रो रात्री 2 वाजेपर्यंत धावणार; विशेष वेळापत्रक जाहीर
सर्वोच्च न्यायालयाच्या आदेशानुसार, 2011 च्या जनगणनेनुसार ही प्रभागरचना जाहीर झाली आहे. यानुसार पुणे शहराची लोकसंख्या 34 लाख 81 हजार 359 इतकी आहे. त्यामुळे 165 सदस्यांसाठी ही निवडणूक पार पडणार आहे. यासाठी 41 प्रभाग बनवण्यात आले आहेत. यातील प्रभाग क्रमांक 38 हा 5 सदस्यीय असून उर्वरित 40 प्रभाग 4 सदस्यीय असणार आहेत.
माहितीनुसार आंबेगाव- कात्रज हा लोकसंख्येनुसार सर्वात मोठाआणि अप्पर सुपर इंदिरानगर हा सर्वात लहान प्रभाग असणार आहे. आंबेगाव- कात्रज प्रभागाची लोकसंख्या 1 लाख 14 हजार 970 आहे. तर अप्पर सुपर इंदिरानगर प्रभागाची लोकसंख्या 75 हजार 944 इतकी आहे. जाहीर झालेल्या प्रभागरचनेनुसार कळस- धानोरी हा पहिल्या क्रमांकाचा प्रभाग असणार आहे. तर महंमदवाडी- उंड्री हा शेवटचा म्हणजेच 41 नंबरचा प्रभाग असणार असणार आहे.
हरकती 3 सप्टेंबरपर्यंत सादर करता येणार
जाहीर केलेल्या प्रारुप प्रभाग रचनेसंदर्भात नागरिकांना हरकती किंवा सूचना असतील त्यांनी 22 ऑगस्ट 2025 ते 3 सप्टेंबर 2025 या कालावधीत पुणे मनपा कार्यालयात लेखी स्वरुपात जमा करण्याचे आवाहन पुणे महानगरपालिकेचे आयुक्त नवल किशोर राम यांनी केले आहे. नागरिकांनी या हरकती किंवा सूचना कार्यालयीन वेळेत पुणे मनपा स्वागत कक्ष पुणे मनपाची सर्व क्षेत्रीय कार्यालये आणि निवडणूक कार्यालय, स्वा.वि.दा. सावरकर भवन या ठिकाणी लेखी स्वरूपात जमा कराव्यात.