मुंबई : विधानसभा निवडुकीत महायुतीचा विजय झाला. जनमताचा कौल लक्षात आल्यावर एकनाथ शिंदे यांनी भाजपाचा मुख्यमंत्री पदाबाबतचा निर्णय मान्य असेल असे जाहीर केले. शिवसेनेकडून या निर्णयात कोणताही स्पीड-ब्रेकर नसेल अशी ग्वाही त्यांनी दिली. शिंदेंनी केलेल्या या घोषणेनंतर महाराष्ट्र भाजपाचे अध्यक्ष चंद्रशेखर बावनकुळे यांनी एकनाथ शिंदेंचे जाहीर आभार मानले. एकनाथ शिंदेंनी मुख्यमंत्री म्हणून उत्तम काम केलं. शिंदेंनी घेतलेली भूमिका ही राज्यातील चौदा कोटी जनतेची भूमिका असल्याचे चंद्रशेखर बावनकुळे म्हणाले.
याआधी राज्याचे काळजीवाहू मुख्यमंत्री एकनाथ शिंदे यांनी पत्रकार परिषद घेतली. सरकार स्थापन करताना माझी अडचण होणार नाही. या संदर्भात पंतप्रधान मोदी आणि केंद्रीय गृहमंत्री अमित शाहांना फोन करुन त्यांच्याशी बातचीत केली आहे. आता पंतप्रधान जो निर्णय घेतील त्याला शिवसेनेचा पाठिंबा असेल असे एकनाथ शिंदे यांनी पत्रकार परिषदेत जाहीर केले. शिंदेंनी केलेल्या घोषणेनंतर महाराष्ट्र भाजपाचे अध्यक्ष चंद्रशेखर बावनकुळे यांनी पत्रकार परिषद घेतली. या पत्रकार परिषदेत बावनकुळे यांनी एकनाथ शिंदेंचे जाहीर आभार मानले.
'नैसर्गिक न्यायानुसार मुख्यमंत्री भाजपाचाच'
नैसर्गिक न्यायानुसार मुख्यमंत्री भाजपाचाच असेल असे वक्तव्य भाजपा नेते सुधीर मुनगंटीवार यांनी केले. यंदाच्या विधानसभा निवडणुकीत भाजपाचे 132 जण निवडून आले. या व्यतिरिक्त निवडणुकीत जिंकून आलेल्या पाच जणांनी भाजपाला पाठिंबा जाहीर केला. यामुळे भाजपाचे संख्याबळ 137 वर जाऊन पोहोचले आहे. राज्याच्या विधानसभेतील 288 पैकी 137 जागा भाजपाच्या आहेत. सभागृहातील सर्वात मोठा पक्ष असल्यामुळे नैसर्गिक न्यायानुसार मुख्यमंत्री भाजपाचाच असेल असे वैयक्तिक मत असल्याचे भाजपा नेते सुधीर मुनगंटीवार म्हणाले. भाजपाच्या पक्ष शिस्तीनुसार राज्यात नेतृत्व कोण करणार ? या प्रश्नाचे उत्तर मोदी - शाह यांच्याकडून मिळेल अथवा त्यांच्या मार्गदर्शनानुसार निर्णय घेतला जाईल. यामुळे मुख्यमंत्री कोण होणार हे दिल्लीतून ठरेल. पण वैयक्तिक मतानुसार देवेंद्र फडणवीस मुख्यमंत्री होऊ शकतात, असे भाजपा नेते सुधीर मुनगंटीवार म्हणाले.
महाराष्ट्र विधानसभा 2024 निवडणुकीचा निकाल
- एकूण 288 जागा
- महायुती 230 जागांवर विजय
- भाजपा 132 जागांवर विजय
- शिवसेना 57 जागांवर विजय
- राष्ट्रवादी काँग्रेस 41 जागांवर विजय
- महाविकास आघाडी 46 जागांवर विजय
- उद्धव ठाकरे गट 20 जागांवर विजय
- काँग्रेस 16 जागांवर विजय
- शरद पवार गट 10 जागांवर विजय
- इतर 12 जागांवर विजय
जिंकून आलेल्या इतर बारा जणांपैकी पाच जणांनी भाजपाला तर तीन जणांनी शिवसेनेला पाठिंबा जाहीर केला आहे. यामुळे भाजपाचे संख्याबळ 137 आणि शिवसेनेचे संख्याबळ 60 झाले आहे. महायुतीचे एकूण संख्याबळ 238 वर पोहोचले आहे.