ठाणे: मुंबई महानगर प्रदेशातील वाहतूक कोंडी ही नेहमीच डोकेदुखी ठरत आली आहे. विशेषतः ठाणे-बेलापूर रस्ता वापरणाऱ्या प्रवाशांना दररोज प्रचंड वाहतूक कोंडीचा सामना करावा लागतो. या मार्गावरून नवी मुंबईकडे जाणारा प्रवास तासाभरापेक्षा जास्त वेळखाऊ ठरतो. मात्र आता राज्य सरकारने या समस्येवर तोडगा काढण्यासाठी मोठा निर्णय घेतला आहे. नवी मुंबई आंतरराष्ट्रीय विमानतळाशी ठाणे थेट जोडणारा 25.2 किलोमीटर लांबीचा सहापदरी उन्नत मार्ग उभारण्यात येणार आहे.
या प्रकल्पामुळे ठाणे-बेलापूर रस्त्यावरून नवी मुंबई आंतरराष्ट्रीय विमानतळावर पोहोचण्यासाठी लागणारा वेळ तब्बल ४० मिनिटांनी कमी होणार आहे. म्हणजेच, आजवर दीड तास लागणारा प्रवास केवळ अर्ध्या तासात पूर्ण होईल.
नवी मुंबई आंतरराष्ट्रीय विमानतळाशी थेट संपर्क
2025 च्या अखेरीस नवी मुंबई आंतरराष्ट्रीय विमानतळ कार्यान्वित होणार आहे. विमानतळ सुरू झाल्यानंतर दरवर्षी 2 कोटींहून अधिक प्रवाशांची ये-जा अपेक्षित आहे. ठाणे, कल्याण-डोंबिवली, अंबरनाथ-बदलापूर, भिवंडी, उल्हासनगर अशा भागातून मोठ्या संख्येने प्रवासी या विमानतळावर पोहोचणार असल्याने वाहतुकीसाठी सोयीस्कर मार्गाची गरज भासणार होती.
सिडकोने तयार केलेल्या प्रकल्प अहवालाला नुकतीच राज्य सरकारकडून मंजुरी मिळाली आहे. हा मार्ग सार्वजनिक-खासगी भागीदारीतून 'बांधा, वापरा आणि हस्तांतरीत करा' या तत्वावर उभारला जाणार आहे.
कसा असेल उन्नत मार्ग?
-
25.2 किमी लांबी आणि सहा मार्गिका असलेला हा उन्नत कॉरिडॉर ठाण्याला थेट विमानतळाशी जोडेल.
-
ठाणे कोस्टल रोड फेज 2 व कोपरी-पटणी पुलाशी हा कॉरिडॉर जोडला जाईल.
-
प्रवाशांना अखंड, सिग्नल-फ्री आणि जलद मार्गाने विमानतळावर पोहोचता येईल.
-
या प्रकल्पाचा पहिला टप्पा 2025 अखेरपर्यंत पूर्ण करण्याचे लक्ष्य ठेवले आहे.
-
वाहतूक कोंडीपासून दिलासा
सध्या ठाणे-बेलापूर रस्त्यावर दररोज हजारो वाहनांची गर्दी होते. विशेषतः कार्यालयीन वेळेत हा मार्ग प्रवाशांसाठी डोकेदुखी ठरतो. नव्या सहापदरी मार्गामुळे ही समस्या मोठ्या प्रमाणात कमी होणार आहे. ठाणे तसेच उपनगरातील नागरिकांना विमानतळावर जाण्यासाठी सुलभ आणि वेळेची बचत करणारा पर्याय उपलब्ध होणार आहे.
शहरी विकासाला गती
या प्रकल्पामुळे फक्त विमानतळ प्रवासच सुलभ होणार नाही तर ठाणे व नवी मुंबई दरम्यानच्या भागातील रिअल इस्टेट, रोजगार आणि व्यापाराला देखील चालना मिळेल. विमानतळामुळे आधीच या परिसरात गुंतवणुकीच्या संधी वाढल्या आहेत आणि आता वाहतुकीची सोय झाल्याने विकासाला आणखी गती मिळेल.
राज्य सरकारच्या या निर्णयामुळे ठाणे व परिसरातील नागरिकांना मोठा दिलासा मिळणार आहे. ठाणे-बेलापूर मार्गावरील वाहतूक कोंडी कमी होऊन वेळेची बचत होईल. तसेच नवी मुंबई आंतरराष्ट्रीय विमानतळावर पोहोचणे अत्यंत सोयीचे होणार आहे. या सहापदरी मार्गाच्या उभारणीमुळे प्रवासाचा अनुभव आधुनिक आणि सुरक्षित होईल, अशी अपेक्षा आहे.