पुणे: राष्ट्रवादी काँग्रेस अजित पवार गटाच्या पिंपरीतील मुळशी शाखेचे पदाधिकारी राजेंद्र हगवणे यांच्या सुनेच्या, म्हणजेच वैष्णवी हगवणे यांच्या मृत्यूने राज्यभरात एकच खळबळ उडाली आहे. वैष्णवी हगवणे मृत्यू प्रकरणात अनेक धक्कादायक खुलासे होत आहेत. अशातच, वैष्णवी हगवणेचा शवविच्छेदन अहवाल 'जय महाराष्ट्र'च्या हाती आला आहे. सूत्रांनुसार, वैष्णवीच्या संपूर्ण शरीरावर जखमा आढळून आल्याचे शवविच्छेदन अहवालात नमूद केले आहे. तसेच, वैष्णवीचा मृत्यू गळफास घेतल्यामुळे झाला आहे, अशी माहिती मिळाली आहे. वैष्णवीच्या शरीरावर झालेल्या जखमांमुळे तिचा मृत्यू झाला असावा, अशी शक्यता शवविच्छेदन अहवालात नमूद केले आहे.
हेही वाचा: वैष्णवी हगवणे हुंडाबळी प्रकरणावर काय म्हणाल्या रोहिणी खडसे?
पिंपरीतील राष्ट्रवादी काँग्रेस पक्षाच्या अजित पवार गटाचे पदाधिकारी राजेंद्र हगवणे, त्यांचा मुलगा आणि त्यांची सून वैष्णवी हगवणे यांच्या आत्महत्येनंतर फरार आहेत. सासरे राजेंद्र हगवणे, तिची सासू, पती, मेहुणे आणि मेहुण्यांसोबत, हुंड्यासाठी वैष्णवीवर अमानुष छळ केल्याचा आरोप आहे. प्रेम विवाहादरम्यान, राजेंद्र हगवणे कुटुंबीयांनी वैष्णवीच्या माहेरच्यांकडून लग्नात 51 तोळे सोने घेतले होते. त्यासोबतच फॉर्च्युनर गाडी, 7 किलो वजनाची चांदीची ताटं, भांडी, अधिक महिन्यात जावयाला सोन्याची अंगठी, वैष्णवीच्या नवऱ्याला दीड लाखांचा मोबाईल गिफ्ट, माहेरी आल्यावर प्रत्येक वेळी जावयाला 50 हजार ते 1 लाख रूपये दिले जात होते. मात्र, जमीन खरेदीसाठी 2 कोटींची मागणी वैष्णवीच्या माहेरच्यांनी पूर्ण न केल्यामुळे वैष्णवीचा छळ करण्यात आला होता. ज्यामुळे तिने राहत्या घरी आत्महत्या केल्याचे सांगितले जात आहे. इतकंच नाही, तर पती शशांक वैष्णवीच्या चारित्र्यावर संशय घेत होता. हगवणे कुटुंबीयांनी वैष्णवीला प्रचंड शारीरिक आणि मानसिक छळ केल्यामुळे राजेंद्र हगवणेंची सून वैष्णवीने राहत्या घरी गळफास घेऊन आत्महत्या केली. या घटनेनंतर अनेक धक्कादायक खुलासे समोर येत आहेत.